MIKAELA tia koh thlarau thil siam hi Bible-ah vawi tam tak sawi lan a ni lo. Amaherawhchu, sawi lan a nihna apiangah thatho taka thil ti mêk anga târ lan a ni ṭhîn. Daniela lehkhabu-ah chuan Mikaela chu vântirhkoh suaksualte nên an indo va; Juda lehkha thawnah chuan Setana nên an inhnial a; tin, Thu Puan bu-ah chuan Diabola leh a ramhuaihote nên an indo a ni. Mikaela chu Jehova rorêlna humhimna leh Pathian hmêlmate beihna hmangin “Pathian Ang Tunge Awm?” tih awmze nei a hming phuin a nung a ni. A nih leh, Mikaela chu tunge ni?

A châng chuan mi hi hming pakhat aia tama koh a ni ṭhîn. Entîr nân, thlahtu Jakoba chu Israela ti pawha hriat a ni a; tin, tirhkoh Petera chu Simona ti pawha hriat a ni bawk. (Genesis 49:1,2; Matthaia 10:2) Chutiang bawkin, Bible chuan Mikaela chu Isua Krista leia a rawn kal hma leh  vâna a kîr leh hnua a hming dang a nih thu a târ lang. Chutianga ngaih dân min siamtîr thei Bible chângte chu i lo en ang u.

Vântirhkoh Chungnung Ber. Pathian Thu chuan Mikaela chu “vântirhkoh chungnung ber” tiin a ko va. (Juda 9) “Vântirhkoh chungnung ber” tih hming Bible-a a lan apiangin a tam sawina hman a ni ngai lo va, pakhat chauh sawina hlîr hman a ni ziah a ni. Chu chuan chutiang chi vântirhkoh pakhat chauh a awm tih a sihhmuh a. Chu mai bâkah, Isua chu vântirhkoh chungnung ber dinhmun nêna thlunzawm tlat a ni. Tholeh Lalpa Isua Krista chungchângah, 1 Thessalonika 4:16 chuan heti hian a sawi: “Lalpa ngei chu au thâwm nên, vântirhkoh chungnung ber aw nên, Pathian tawtawrâwt ri nên, vân aṭangin a lo chhuk dâwn si a,” tiin. Hetiang hian, Isua aw chu vântirhkoh chungnung ber aw anga sawi a ni. Chuvângin, he Bible châng hian Isua ngei chu vântirhkoh chungnung ber Mikaela a nihzia a sihhmuh a ni.

Sipai Hruaitu. Bible chuan “Mikaela leh a vântirhkohte chuan dragon . . . leh a tirhkohte . . . an do” thu a sawi a. (Thu Puan 12:7) Chutiang chuan, Mikaela chu vântirhkoh sipai rinawmte Hruaitu a ni. Thu Puan pawhin Isua chu vântirhkoh sipai rinawmte Hruaitu angin a târ lang. (Thu Puan 19:14-16) Tin, tirhkoh Paula pawhin “Lalpa Isua” leh “a vântirhkoh chak takte” chungchâng a sawi bawk. (2 Thessalonika 1:6-8) Chuti chuan, Bible chuan Mikaela leh “a vântirhkohte” leh Isua leh “a vântirhkohte” chungchâng chu a sawi ve ve a ni. (Matthaia 13:41; 16:27; 24:31; 1 Petera 3:22) Bible hian vânah vântirhkoh sipai rinawm pâwl pahnih—pakhat Mikaela kaihhruai leh a dang Isua kaihhruai—a awm thu a sawi lan loh avângin, Mikaela chu tu dang ni lovin, vân lam thuneihna chelhtu Isua Krista sawina bawk a ni tia thu tâwp siam chu a inâwm hle a ni. *