IN TZAJ kyqʼamaʼn junjun texto toj Tyol Dios qa at jun anjel in nok tbʼi te Miguel. Pero kyoj kykyaqil texto lu at jun tiʼ in bʼant tuʼn anjel lu. Toj tuʼj Daniel, in qʼojin kyukʼe nya bʼaʼn anjel, toj tuʼj Judas, otaq tzʼetz kyqʼoj tukʼe Tajaw il, atzun toj uʼj te Apocalipsis in qʼojen tiʼj Satanás ex kyiʼj t-anjel. A jlu in tzaj tyekʼun qa kukx in kolin tiʼj toklen Jehová tuʼn tKawin ex in qʼojin kyiʼj qeju in che qʼojen tiʼj Jehová. Iktzen tten in japun tuʼn aju t-xilen tbʼi «¿Alkye Jun Jaku Tzʼok Ik Tzeʼn Dios?». Pero ¿alkye in nok tbʼi te Miguel?

Tnejel, bʼaʼn tuʼn ttzaj qnaʼn qa at maj nya junx tbʼi jun xjal tok. Ik tzeʼn Jacob, aju ok te kytat nim (bʼampo) xjal, ok qʼoʼn tbʼi te Israel, ax ikx apóstol Pedro, ok qʼoʼn tbʼi te Simón (Génesis 49:1, 2; Mateo 10:2). Ax ikx in tzaj tqʼamaʼn Tyol Dios qa aju juntl tbʼi Jesucristo in nok aju Miguel, nya oʼkx tej naʼmxtaq tul tzalu twitz Txʼotxʼ ax ikx tej tmeltzʼaj juntl maj toj kyaʼj. Kbʼelex qjyoʼn toj Tyol Dios tiquʼn in xi qqʼamaʼn qa ik tten jlu.

Tnejel anjel. In tzaj tqʼamaʼn Tyol Dios qa a «Miguel nejenel kye anjel» (Judas 9). A jlu in tzaj tyekʼun qa a Miguel tnejel anjel, ex qa naq junx anjel at ik tzeʼn jlu. Mitiʼ (tiloʼ) in tzaj tqʼamaʼn Tyol Dios qa at nim kybʼet anjel lu. Aj tyolin Tyol Dios tiʼj tnejel anjel atz in yolin tiʼj Jesús. In tzaj qʼamaʼn jlu tiʼjju kbʼantel tuʼn Jesús: «Quʼn ax te qAjaw kʼwelitz toj kyaʼj tukʼa jun tqʼajqʼojil twiʼ kujxix wen, ex tukʼa tqʼajqʼojil twiʼ tnejil angel» (1 Tesalonicenses 4:16, ATM). Aju texto lu in tzaj tqʼamaʼn qa ok kyolil  Jesús tukʼe tqʼajqʼajel twiʼ tnejel anjel. A jlu in tzaj tyekʼun qa ax Jesús in nok te tnejel anjel Miguel.

Nejenel. In tzaj tqʼamaʼn Tyol Dios qa «ate Miguel kyukʼix qe t-anjel e qʼojin tiʼj ju jil [moqa txkup] Dragón; ax ikx ju jil Dragón kyukʼix qe t-anjel e qʼojin» (Apocalipsis 12:7). A jlu in tzaj tyekʼun qa a Miguel nejenel kye nimxix tbʼanel anjel. Ax ikx in tzaj qʼamaʼn toj Apocalipsis qa a Jesús nejenel kye nimxix tbʼanel anjel (Apocalipsis 19:14-16). Ax ikx tzaj tqʼamaʼn apóstol Pablo qa a «Qajaw Jesús, ktzajel tuj kyaʼj kyukʼix qe t-anjel at nim kyipumal» (kybʼalor) (2 Tesalonicenses 1:7). Ik tzeʼn ma qo xnaqʼtzan tiʼj, in yolin Tyol Dios tiʼj Miguel kyukʼe «t-anjel» ex tiʼj Jesús kyukʼe «t-anjel» (Mateo 13:41; 16:27; 24:31; 1 Pedro 3:22). Pero mitiʼ in yolin Tyol Dios qa iqʼen jun kʼloj tbʼanel anjel tuʼn Miguel ex mitiʼ in yolin qa iqʼen juntl kʼloj tbʼanel anjel tuʼn Jesús. A jlu in tzaj tyekʼun qa ax Jesucristo in nok tbʼi te Miguel aju in naqʼanan toj kyaʼj. *