HEVEN RA spirit kum Maikal maki ba dahra, Baibil tikska kum kum ra man aisisa. Bara tikska kumi banira Maikal ba wark kum daukisa: Danyal ulbanka ra, insal saura nani mapara aiklabisa; Judas wauhkataya ra, Debil wal blahwisa, bara Param marikan [Reveleshan] ulbanka ra, Setan bara ai lasika nani mapara war aiklabisa. Au sika! Maikal mita, Jehova wan Kingka baku karnika bri ba ta baiki muni, Gâd waihla nani mapara ban aiklabisa. Baku daukisi ai nina dia tanka bri ba marikisa, kan Maikal nina ba sika “Ya Gâd Baku Sa ki?” tanka sa. Bahamna, Maikal ba ya sa ki?

Kau diara wiras kainara nu bas upla kum kum ba ai nina wal, apia kaka yuhmpa kat sin brisa. Naha tanka ra, Jekob pamali tara kum damika takan ba ra, nina wala Israel maki kan, bara apastil Pita ra sika Saiman maki kan (Blasi sturka 49:1, 2; Matyu 10:2). Sim baku, Baibil ba marikisa Jisas Kraist nina wala ba Maikal sa. Jisas tasba ra balras kainara, bara kli heven ra wan ningkara sin baha ai nina makan. Baibil smalki ba kat dia muni yawan baku wi ba kaisa kaikaia.

Arkinsal. Baibil ba “arkinsal Maikal” dahra aisisa (Judas 9). Arkinsal ba sika “insal nani lalka” tanka sa. Kaiki baku, Maikal ra  arkinsal sin makisa, wibia sa kaka, arkinsal kumi baman bara ba tanka marikisa. Kasak sika! Kan Baibil ra ailal dahra aisi baku, arkinsal nani, aima kumira sin wiras. Baku sin, Baibil ba marikisa Jisas ba arkinsal warkka daukisa. Naha tanka ra 1 Tesalonaika 4:16 bila Jisas prura wina bukan ningkara naku daukbia wisa: “Dawan pali ba sika bila baikra karnakira ba wal kasbrika pura ba wina bal iwbia arkinsal bila baikra wal”. Tikska bila Jisas ba arkinsal bila baikra wal aisabia wisa. Baku lika marikisa, Jisas ba arkinsal Maikal sika.

War Daknika Ta Upla. Baibil bila: “Maikal ai insalka nani aikuki [...] dragunka ai insalka nani sut kira sin mapara bui aiklaban” (Param marikan 12:7). Maikal ba insal nani War Daknika kum Ta Uplika taki ba latan sa. Bara Param marikan ulbanka ra, Jisas ba sin insal nani War Daknika kum Ta Uplika baku takisa (Param marikan 19:14-16). Bara apastil Pâl mita sin “Dawan Jisas” wihki “ai insalka karnakira nani” dukyara latan pali aisisa (2 Tesalonaika 1:7). Baku bamna, Baibil ra Maikal wihki “ai insalka nani” dukyara, bara Jisas wihki “ai insalka nani” dukyara sin aisi marikisa (Matyu 13:41; 16:27; 24:31; 1 Pita 3:22). Sakuna, insal wapni nani war daknika wal, kum ba Maikal ta brisa, bara wala Jisas ta brisa tanka ra, Baibil tikska kumi sin apu sa. Baha taka mita, sinska kat wiaia sip sa, Maikal ba sika Jisas Kraist heven ra wark taki ba tanka sa.