SEKINOK TLAMACHTILI
¿Ajkia nopa iluikaejketl Miguel?
ILUIKAEJKETL Miguel nesi itoka san ipan se keski textos ipan Biblia. Uan kiijtoua nochipa kichiua se tlamantli. Ipan Daniel kiijtoua moteuia ininuaya amo kuali ajakamej, ipan Judas kiijtoua mokualania iuaya Diablo uan ipan Apocalipsis o Revelación kiijtoua moteuia ininuaya Satanás uan amo kuali iajakauaj. Uajka, Miguel nochipa kinextia san Jehová kinamiki tlanauatis uan moteuia ininuaya toTeotsij ikualankaitakauaj. Yeka, kinamiki ma kitokaxtikaj Miguel tlen kiijtosneki “¿Ajkia kej toTeotsij?”. Uajka, ¿ajkia nopa iluikaejketl Miguel?
Sekij kipiaj ome inintoka. Jacob nojkia kitokaxtijkej Israel uan apóstol Pedro nojkia kitokaxtijkej Simón (Génesis 49:1, 2; Mateo 10:2). Biblia kiijtoua kema Jesús ayamo ualajtoya uan teipa kema yajki iluikak, kitokaxtiyayaj Miguel. Ma tikitakaj ipan Biblia kenke kej nopa kitokaxtiaj.
Iluikaejketl katli tlayakana. Biblia kiijtoua Miguel yaya “itlayakankailuikaejka toTeko” (Judas 9). Ni kiijtosneki Miguel kinyakana iluikaeuanij uan amo itstok seyok iluikaejketl kej ya yon miakej iluikaeuanij katli tlayakanaj. Biblia nochipa kiijtoua Jesús kinyakana iluikaeuanij. Ipan 1 Tesalonicenses 4:16 kiijtoua: “Tsajtsis ika ueyi tlanauatili uan ualtemos tlen iluikak. Uan iiluikaejka toTeko tlen más kipia chikaualistli kamatis nelia chikauak”. Ni kinextia Miguel yaya kinyakana iluikaeuanij.
Kinyakana itlateuijkauaj. Biblia kiijtoua: “Tlayakankailuikaejketl, Miguel, uan nopa iluikaeuanij tlen yajaya kinyakanayaya moteuijkej iuaya nopa dragón uan iiluikaejkauaj” (Apocalipsis 12:7). Uajka, Miguel kinyakana miakej itlateuijkauaj, uan ipan Revelación nojkia kiijtoua Jesús kinyakana tlauel miakej itlateuijkauaj (Revelación 19:14-16, TNM). Apóstol Pablo nojkia kiijtok “Jesucristo” kipia “iiluikaejkauaj tlen kipiaj uejueyi chikaualistli” (2 Tesalonicenses 1:7). Uajka, Biblia kiijtoua Miguel kipia “iiluikaejkauaj”, uan nojkia kiijtoua Jesús kipia “iiluikaejkauaj” (Mateo 13:41; 16:27; 24:31; 1 Pedro 3:22). Biblia amo kiijtoua tlaj Miguel kinpia miakej itlateuijkauaj, uan Jesús nojkia kinpia sekinok itlateuijkauaj. Ni kinextia Miguel yaya Jesús katli tekichijtok ne iluikak. *
^ párr. 1 Tijpantis sekinok tlamantli tlen kinextia Miguel yaya toTeotsij iKone ipan amochtli Perspicacia para comprender las Escrituras, vol. 2, iamayo 386 uan 387 tlen kichijtokej Jehová itlajtoltemakauaj.
