ITECH Biblia katej san seki tlaxelolmej kanin se ángel kitokayotiaj Miguel. Uan itech nochi tlaxelolmej nochipa itlaj kichijtok. Itech Daniel techiluia moteuijtok iuan amo kuali ejekamej, itech Judas techiluia mokualanijtok iuan Diablo, uan itech Apocalipsis techiluia moteuijtok iuan Satanás uan amo kuali iejekauan. Nochipa kipaleuia itlanauatilis Jehová ken se Tekiua, uan moteuia iuan akinmej kikokoliaj. Uan ijkon kiueyichiua itoka tlen kijtosneki “¿Akin Ijkon Ken ToTajtsin Dios?”. Maski ijkon, ¿akin Miguel?

Axkan, ma tikilnamikikan sekimej tlaltikpaktlakamej kipiaj ome intoka. Se neskayotl, Jacob, tlen otlayekanaya itech ikalchanejkauan noijki omotokayotiaya Israel, uan Pedro noijki omotokayotiaya Simón (Génesis 49:1, 2; Mateo 10:2). Noijki ijkon, Biblia kijtoa Miguel okse tokayotl tlen kipia Jesucristo, akin achto ualaskia itech Tlaltikpak uan ijkuak omokuepki iluikak ijkon kitokayotiaj. Axkan ma tikitakan seki tlaxelolmej kanin techiluiaj Miguel ye Jesucristo.

 Arcángel. Biblia kitematiltia Miguel ken se “arcángel” (Judas 9). Nin kijtosneki “se ángel tlen tlayekantok”. Nikan tikitaj Miguel motokayotia arcángel, nin techmachtia amo katej oksekimej ángeles ken ye. Uan itech Biblia tlajtoli arcángel san kitekitiltia pampa tlajtos itech se ángel, amo tlajtoa itech miakej. San Jesús tekiti ken se arcángel. Ijkon tikitaj itech 1 Tesalonicenses 4:16, kanin techiluia tlen kichiuas Jesús akin okiyolitijkej: “Porke inewia n Toteko waltemos de ilwikak ika chikawak tlájtoli kemi se tekiwa. Tlajtos kemi se non kinyakana n ángelteh”. Itech nin tlaxelol kijtoa Jesús tlajtos ken se akin kinyekana ángeles. Uan ijkon moajsikamati Jesús ye arcángel Miguel.

Tlayekana. Biblia kijtoa “Miguel iwa iangelwah omotekilmakakeh iwa n dragón iwa [...] iángelwah” (Apocalipsis 12:7). Nikan tikajsikamatij Miguel ye Kinyekana ángeles yolmelauakej. Itech Apocalipsis noijki techiluia Jesús ye Kinyekana ángeles yolmelauakej (Apocalipsis 19:14-16). Uan tlatitlanil Pedro otlajto itech ángeles tlen Jesús kinnauatia (1 Pedro 3:22). Kema, Biblia tlajtoa itech Miguel uan “iangelwah”, uan noijki tlajtoa itech Jesús uan “iangelwah” (Mateo 13:41; 16:27; 24:31). Itech Biblia amo kanaj kijtoa katej ome nechikolmej itech ángeles yolmelauakej, se ma kinyekana Miguel uan okse ma kinyekana Jesús. Uan ijkon moajsikamati Miguel ye Jesucristo akin tekititok iluikak. *