CISIKWA co kumujimu cinodaninjwa kuti Migeri acinyanyi kunangwa maningi mu Bhaibheri. Kaveta, pacinonga cecinangwa, cinonga ceciita ciri cese. Mu bhuku ra Dhanieri, Migeri ari kutakana no ngirozi jakashata; mu karata ya Judha, iyena ari kuhwisana na Sathana; zve muna Apokalipsi Migeri ari kuhwa hondo na Dhiabho no madhimoni ake. Ngo kuinikira kutonga ka Jehovha, zve no kuhwisana no vavengi va Mwari, Migeri anorarama mukuzwirana no revo yo zina rake—“Ndiyani Wakatojana na Mwari?” Asi ndiyani Migeri?

Panguva jimweni, vandhu vanozivika ngo mazina mazinji. Inga muezaniso, teteguru Jakobe, vaizivikanwavo inga Iziraeri, zve mupostori Pedhuru, waizivikanwa inga Simoni. (Genesi 49:1, 2; Mateu 10:2) Mukufananavo, Bhaibheri rinotatija kuti Migeri, i zina rimweni ra Jesu Kristu, acito ararama pasi pano zve naapinda kudenga. Ngatimbovona Matahwa anotiitisa kuti tigume pa mbhejiso iyi.

Arkanjo. Soko ra Mwari rinonangira Migeri kuti ndi “Arkanjo.” (Juda 1:9) Gama iri, rinonangira “nduna yo ngirozi.” Vonanyi kuti  Migeri anodaninjwa kuti arkanjo. Izvi zvinovonesa kuti kuno ngirozi imwe basi yakadaro. Zvokadi, gama ro kuti “arkanjo” rinowanika mu Bhaibheri recinangira mundhu umwe basi, apana parinonangira vandhu vakawanda. Zvimweni ngo zvokuti, cigaro ca arkanjo cinozwirana na Jesu. Ngo pamusoro po kumuswa ka Tenji Jesu Kristu, 1 VaTesalònika 4:16, NM inoti: ‘Tenji pacake, anozobzuka kubva kudenga ecidaninjira ngo simba, no izwi ra arkanjo.’ Hino izwi ra Jesu rinosananguhwa inga arkanjo. Ngokudaro, vhesi iyi inovonesa kuti Jesu pacake ndi arkanjo Migeri.

Mutungamiriri wo masoca. Bhaibheri rinonanga kuti “Migeri no ngirozi jake jakarovana no cikara ciya . . . no Ngirozi jaco.” (Apokalipsi 12:7, 8) Waro, Migeri ndiyena mutungamiriri wo masoca o ngirozi jakagondeka. Bhuku ra Apokalipsi rinosananguravo Jesu inga mutungamiriri wo masoca o ngirozi jakagondeka. (Apokalipsi 19:14-16) Zve mupostori Pauro wakanasa kunanga kamare ndi “Tenji Jesu” no “ngirozi jo simba rake.” (2 VaTesalònika 1:7) Ngo kudaro, Bhaibheri rinobhuya ngo pamusoro pa Migeri no “ngirozi jake” zve Jesu no “ngirozi jake.” (Mateu 13:41; 16:27; 24:31; 1 Pedru 3:22) Zvecivoneka kuti Soko ra Mwari apana parinonanga kuti kuno zvikwata zviviri zvo masoca akagondeka o ngirozi kudenga—cikwata cimwe cecitungamirihwa ndi Migeri, zve cimweni ndi Jesu—zvinomusoro kudavira kuti Migeri ndiyena Jesu Kristu ari pa utongi hwake hwo kudenga. Akuna umwenizve. *