APENDISE
Olie Mingeli Arkandyu?
OANDYU itiwa o Mingeli, kaipopiwa unene mo Mbimbiliya. Mahi, tyina Ombimbiliya ipopia konthele ya Mingeli, una etyi ekahi nokulinga. Omukanda wa Daniele, upopia okuti Mingeli ukahi nokulwisa onoandyu onombi. Mu Juda, ukahi nokulipatana na Satanasi. Mu Revelação ukahi nokulwa na Satanasi novilulu viae ine noandyu onombi. Putyina Mingeli alwisa onondyale mba Huku, nokuamena outumini wa Jeova, ngotyo ukahi nokulekesa etyi tyihangununa enyina olio. Mokonda enyina Mingeli lihangununa okuti ‘Olie Ulifwe na Huku?’ Mahi, Mingeli olie?
Ovanthu vamue veiwe nomanyina omanyingi. Jako ankho tupu utiwa o Isilayeli, iya apostolu Petulu tupu ankho utiwa o Simau. (Gênesis 49:1,2; Mateus 10:2) Tupu, Ombimbiliya ipopia okuti Mingeli enyina ekuavo lia Jesus Kristu, tunde puetyi eheneye pano pohi, netyi akondoka keulu. Tutalei Onotestu mbupopia konthele yotyo.
Arkandyu. Ondaka ya Huku ipopia konthele ya Mingeli Arkandyu. (Judas 9) Ondaka Arkandyu, ilekesa okuti onkhalamutue yonoandyu. Tala okuti Mingeli wiihanua okuti o arkandyu. Otyo, tyilekesa okuti kuna vala oandyu ike itiwa arkandyu. Mokonda mo Mbimbiliya ondaka oyo, ipopia vala oandyu ike, kaipopi ononyingi. Iya otyilinga tya Jesus tyelifwa no tyoandyu arkandyu. Omukanda wa 1 Tessalonicenses 4:16 upopia konthele ya Tatekulu Jesus Kristu okuti: ‘Tatekulu malauka keulu nondaka yomutumini, nondaka yo arkandyu.’ Motestu ei, ondaka ya Jesus yatiwa ondaka yo arkandyu. Otyo, tyilekesa okuti Jesus oe Mingeli arkandyu.
Onkhalamutue yo Noandyu. Ombimbiliya ipopia okuti ‘Mingeli no noandyu mbae vekahi nokulwa nenyoka enene . . . nonondele mbalio ine onoandyu onombi. (Revelação [Apocalipse] 12:7) Ngotyo, Mingeli Onkhalamutue yo noandyu mbekolelo. Tupu, omukanda wa Revelação upopia okuti Jesus Onkhalamutue yo noandyu mbekolelo. (Revelação [Apocalipse] 19:14-16) Apostolu Paulu nae wapopia konthele ya ‘Tatekulu Jesus’ no ‘noandyu mbae mbononkhono ononene’. (2 Tessalonicenses 1:7; Mateus 16:27; 24:31; 1 Pedro 3:22) Ombimbiliya ipopia konthele ya Mingeli no ‘noandyu mbae’ na Jesus no ‘noandyu mbae’. (Mateus 13:41) Mahi, Ondaka ya Huku kailekesa okuti keulu kuna ononthumbo onombali mbo noandyu, okuti imue ituminwa na Mingeli, onkhuavo ituminwa na Jesus. Otyo, tyilekesa okuti Mingeli o Jesus Kristu, wapeua otyilinga tyokukala onkhalamutue yonoandyu keulu. a
a Ehangununo ekuavo lilekesa okuti Mingeli enyina lio Mona wa Huku, likahi momukanda Estudo Perspicaz das Escrituras Volume 2 pomafo 828-9, walingua no Nombangi mba Jeova.
