Mikaeli, Maraika Omukuru Niwe Oha?

EKIHANGIRWE ky’omwoyo ekirikwetwa Mikaeli tikirikugambwaho munonga omu Baibuli. Kwonka, ku arikugambwaho, naaba aine eki arikukora. Omu kitabo kya Danieli, Mikaeli naagambwaho arikurwanisa baamaraika ababi; omu baruha ya Yuda, naagambwaho arikuhakanisa Sitaane; kandi omu kitabo kya Okushuuruurwa, naagambwaho arikurwanisa Omuregi hamwe na baadaimoni be. Arikurwanirira obutegyeki bwa Yehova kandi arikurwanisa abazigu ba Ruhanga, Mikaeli naakora ebi eiziina rye ririkumanyisa—“N’Oha Ori Nka Ruhanga?” Kwonka shi Mikaeli niwe oha?

Obumwe, abantu nibamanyirwa aha maziina agarikukira ahari rimwe. Nk’eky’okureeberaho, Yakobo naamanywa nka Israeli, kandi n’entumwa Petero naamanywa nka Simooni. (Okutandika 49:1, 2; Matayo 10:2) Omu muringo nigwo gumwe, Baibuli neeyoreka ngu Mikaeli n’eiziina rya Yesu Kristo erindi, atakaizire kandi na bwanyima y’okuruga omu nsi. Ka twetegyereze bimwe ebiri omu Byahandiikirwe ebirikutuhitsya aha kugira ngu Mikaeli n’eiziina rya Yesu.

Maraika Omukuru. Ekigambo kya Ruhanga nikyeta Mikaeli “maraika omukuru.” (Yuda 9) Yetegyereze ngu Mikaeli naayetwa maraika ogwo omukuru. Eki nikyoreka ngu maraika omukuru n’omwe wenka. Ekigambo “maraika omukuru” omuri Baibuli nikikoresibwa ahari maraika omwe wenka hatari ahari baingi. Kandi n’ekindi, Yesu naayorekwa kuba aine akakwate n’omwanya ogwo omukuru. Ebirikukwata aha kuzooka kwa Mukama waitu Yesu Kristo, 1 Abatesalonika 4:16 nirugira ruti: “Ahakuba Mukama aryayeimukira ashuume naaruga omu iguru agambe munonga n’eiraka rya maraika omukuru.” N’ahabw’ekyo eiraka rya Yesu nirishobororwaho  nk’erya maraika omukuru. N’ahabw’ekyo, ekyahandiikirwe eki nikyoreka ngu Yesu wenka niwe Mikaeli, maraika omukuru.

Mukuru w’Amahe. Baibuli neegira ngu ‘Mikaeli hamwe na baamaraika be bakarwanisa ekijoka na baamaraika baakyo.’ (Okushuuruurwa 12:7) N’ahabw’ekyo, Mikaeli niwe Mukuru w’amahe ga baamaraika abeesigwa. Ekitabo kya Okushuuruurwa nikyongyera kishoborora ahari Yesu nk’Omwebembezi w’amahe ga baamaraika abeesigwa. (Okushuuruurwa 19:14-16) N’entumwa Paulo naagamba ahari “Mukama Yesu” kandi n’ahari “baamaraika be ab’amaani.” (2 Abatesalonika 1:7) N’ahabw’ekyo, Baibuli neegamba ahari Mikaeli na “baamaraika be” kandi n’ahari Yesu na “baamaraika be.” (Matayo 13:41; 16:27; 24:31; 1 Petero 3:22) Obu hatariho na hamwe omu Kigambo kya Ruhanga aharikworeka ngu omu iguru hariyo amahe ga baamaraika abeesigwa ag’emiringo ebiri—eririkwebemberwa Mikaeli n’eririkwebemberwa Yesu,—kihikire okugira ngu Mikaeli buzima niwe Yesu Kristo omu mwanya gwe ogw’omu iguru. *

[Obugambo obw’Ahansi]