BƐNDA bɛmbɔ sunsum nu abɔdeɛ ne mɔɔ bɛfɛlɛ ye Maekeɛle la duma wɔ Baebolo ne anu. Noko akee, mekɛ biala mɔɔ bɛkɛbɔ ye duma la ɛnee ɔ nye ɛbolo ɔlɛyɛ debie. Wɔ Daneɛle buluku ne anu, Maekeɛle nee anwumabɔvolɛ atisesebɛma ɛlɛko; wɔ Dwuudu kɛlata ne anu, ɔ nee Seetan ɛlɛsu kpolera; yɛɛ wɔ Yekile buluku ne anu, ɔ nee Abɔnsam nee ye sunsum evinli ne mɔ ɛnyia konle. Maekeɛle dua Gyihova tumililɛ mɔɔ ɔgyinla ɔ nzi nee Nyamenle agbɔvolɛ mɔɔ ɔ nee bɛ ko la azo bɔ ye ɛbɛla kɛmɔ ye duma ne kile la—“Nwane A Le Kɛ Nyamenle A?” Noko, nwane a le Maekeɛle?

Ɔdwu mekɛ ne bie a bɛfa duma mɔɔ bo ko la bɛfɛlɛ sonla ne bie. Kɛ neazo la, Gyekɔbo mɔɔ dɛnlanle aze tete ne la duma bieko a le Yizilayɛ, yɛɛ ɛnee bɛfɛlɛ ɛzoanvolɛ Pita noko Saemɔn. (Mɔlebɛbo 49:1, 2; Mateyu 10:2) Zɔhane ala a, Baebolo ne kile kɛ kolaa na Gyisɛse Kelaese ara azɛlɛ ye azo la ɛnee bɛfɛlɛ ye Maekeɛle, na mekɛ mɔɔ ɔziale ɔhɔle anwuma la, duma zɔhane ala a bɛvale bɛvɛlɛle ye a. Maa yɛzuzu Ngɛlɛlera nu edwɛkɛ bie mɔ mɔɔ maa yɛkola yɛka ye zɔ la anwo.

Anwumabɔvolɛ Kpanyinli. Nyamenle Edwɛkɛ ne fɛlɛ Maekeɛle kɛ ‘anwumabɔvolɛ kpanyinli ne.’ (Dwuudu 9) Ɛhye kile kɛ anwumabɔvolɛ kokye a bɛfɛlɛ ye zɔhane a. Nɔhalɛ nu, duma ‘anwumabɔvolɛ kpanyinli ne’ mɔɔ finde Baebolo ne anu la kile sonla ko ala, ɔngile menli dɔɔnwo. Bieko, Gyisɛse lɛ gyinlabelɛ kɛ anwumabɔvolɛ kpanyinli. 1 Tɛsalonaekama 4:16 ka ye wɔ Awulae Gyisɛse Kelaese mɔɔ bɛdwazo ye la anwo kɛ: ‘Yɛbade anwumabɔvolɛ kpanyinli ne ane, . . . na Awulae ɔdaye mumua ne ɔvi anwuma lɔ ɔbadwu aze.’ Yemɔti, bɛha Gyisɛse ane ne anwo  edwɛkɛ kɛ anwumabɔvolɛ kpanyinli ne. Ɛhye ati, ngɛlɛlera ɛhye kile kɛ Gyisɛse mumua ne a le anwumabɔvolɛ kpanyinli Maekeɛle a.

Ɛlɔne Adekilevolɛ. Baebolo ne ka kɛ ‘Maekeɛle nee ye anwumabɔvolɛma nee nane anwo ɛzulolɛ ne nee ɔdaye ye anwumabɔvolɛma honle.’ (Yekile 12:7) Ɛhye ati, Maekeɛle a le anwumabɔvolɛ ɛlɔnema mɔɔ di nɔhalɛ la Adekilevolɛ a. Yekile eza ka Gyisɛse anwo edwɛkɛ kɛ ɔli anwumabɔvolɛ ɛlɔnema mɔɔ di nɔhalɛ la anyunlu. (Yekile 19:14-16) Na ɛzoanvolɛ Pɔɔlo ka “Awulae Gyisɛse” nee ‘ye anwumabɔvolɛma mɔɔ lɛ tumi’ la anwo edwɛkɛ wienyi. (2 Tɛsalonaekama 1:7) Yemɔti Baebolo ne ka Maekeɛle nee ‘ye anwumabɔvolɛma’ yɛɛ Gyisɛse nee ‘ye anwumabɔvolɛma’ anwo edwɛkɛ. (Mateyu 13:41; 16:27; 24:31; 1 Pita 3:22) Kɛmɔ Nyamenle Edwɛkɛ ne ɛnga ye wɔ ɛleka biala kɛ anwumabɔvolɛ ɛlɔnema nwiɔ mɔɔ di nɔhalɛ la a wɔ anwuma—mɔɔ Maekeɛle li ko anyunlu yɛɛ Gyisɛse noko li ko anyunlu la ati—yɛkola yɛka ye kɛ duma mɔɔ bɛfa bɛfɛlɛ Gyisɛse Kelaese wɔ anwuma la a le Maekeɛle. *