KOASOIPEN tohnleng me mwarenki Maikel sohte kalapw pwarada nan Paipel. Ahpw, ahnsou me koasoipe kin pwarada, e kin pid duwen mehkot me e ketin wiewia ahnsowo. Nan pwuhken Daniel, Maikel kin ketin mahmahweniong tohnleng suwed akan. Nan pwuhken Sud, e kin ketin akahkamaiong Sehdan. Oh nan pwuhken Kaudiahl, e kin ketin mahmahweniong Tepil oh ienge ngehn saut akan. Ni eh kin ketin utung sapwellimen Siohwa kaunda oh kin ketin mahweniong sapwellimen Koht imwintihti kan, Maikel kin ketin kapwaiada wehwehn mwareo me iei “Ihs me Duwehte Koht?” Eri ihs Maikel?

Mie ekei aramas me adarail me tohto. Karasepe, Seikop pil kin adaneki Israel, oh wahnpoaron Piter pil kin adaneki Saimon. (Senesis 49:1, 2; Madiu 10:2) Ni soangen ahlohte, Paipel kin kasalehda me Maikel iei pil ehu mwaren Sises Krais mwohn oh pil mwurin sapwellime mour pohn sampah. Kitail pahn tehkpene kahrepe kan sang nan Paipel me kadehdehda met.

Tohnleng lapalap. Mahsen en Koht kin mahsanih duwen “tohnleng lapalap” Maikel. (Sud 9) Lepin lokaia “tohnleng lapalap” me Paipel mahsanih kin pid emente, sohte daulih emen. Met wehwehki me emente me wia tohnleng lapalapo. Pil patehng met, Paipel kin kasalehda me Sises ketin sapwellimaniki pwukoa en tohnleng lapalap. Me pid Kaun Sises Krais me iasadahr, 1 Deselonika 4:16 mahsanih: “Ngilen ruwes ehu pahn wiawi, iei ngilen tohnleng lapalap emen.” Wasaht kin kawehwehda me ngilen Sises iei ngilen tohnleng lapalap emen. Kahrehda iren Paipel wet kin kasalehda me Sises iei tohnleng lapalap Maikel.

Kaun en karis en sounpei. Paipel mahsanih me “Maikel oh ienge tohnleng kan mahweniong drakono . . . oh ienge kan.” (Kaudiahl 12:7) Kahrehda Maikel wia Kaun en karis  en sounpei en tohnleng lelepek kan. Pwuhken Kaudiahl pil kin kawehwehda me Sises wia Kaun en karis en sounpei en tohnleng lelepek kan. (Kaudiahl 19:14-16) Wahnpoaron Pohl pil kin kosoaia duwen “Kaun Sises” oh “sapwellime tohnleng manaman akan.” (2 Deselonika 1:7) Eri, Paipel kin mahsanih duwen Maikel oh “ienge tohnleng kan,” oh Sises oh “sapwellime tohnleng kan.” (Madiu 13:41; 16:27; 24:31; 1 Piter 3:22) Pwehki sohte wasakis nan Paipel kin kasalehda me mie karis en sounpei en tohnleng lelepek riau nanleng, ehu me mi pahn Maikel oh pil ehu me mi pahn Sises, e konehng kitail en nda me Maikel iei Sises Krais ni eh ket nan sapwellime pwukoa nanleng.