NA Biblia, i ka faladu ciu di kriatura spiritual comadu Migel. Ma, ora ki na papiadu del i ta sta na ason. Na livru di Daniel, Migel sta na geria ku anjus mau; na karta di Judas i sta na diskuti ku Satanas; i na Apokalipsi, i sta na geria kontra Diabu ku si dimonius. Pa manera ki difindi guvernu di Jeova i geria kontra inimigus di Deus, Migel vivi sugundu signifikadu di si nomi — “Kin ku sedu suma Deus?” Ma kin ki Migel?

I ta ten bias ku jintis ta kunsidu ku mas di ki un nomi. Pur izemplu, ŝef di familia, Jako, kunsidu tambi ku nomi Israel, i apostulu Pedru kunsidu tambi ku nomi Simon. (Kumsada 49:1, 2; Mateus 10:2) Di mesmu manera, Biblia mostra ki Migel i utru nomi di Jesus kristu, antis i dipus di si vida na Tera. No jubi na Biblia motivus ku lebanu ciga nes konkluson.

Arkanju. Palabra di Deus coma Migel di “ŝef di anjus” o arkanju. (Judas 9) Palabra “arkanju” ta ojadu na Biblia so na singular, nunka na plural. Es misti mostra di kuma, i ten so un anju des tipu. Alen di kila, kargu di arkanju relasionadu ku Jesus. Aserka di Siñor Jesus Kristu ku resusitadu, 1 Tesalonisensis 4:16 fala: “I na ten gritu di ordi, ku vos di arkanju, . . . Siñor propi i na disi di  seu.” Vos di Jesus faladu del suma vos di arkanju. Asin, es versikulu mostra kuma Jesus propi ki arkanju Migel.

Lider di izersitu. Biblia fala ki “Migel ku si anjus geria kontra dragon . . . ku si anjus.” (Apokalipsi 12:7) Asin, Migel i Lider di un izersitu di anjus fiel. Apokalipsi fala tambi di Jesus suma Lider di un izersitu di anjus fiel. (Apokalipsi 19:14-16) I di un manera spesifiku, apostulu Paulu fala di “Siñor Jesus” ku “si anjus ku ten puder.” (2 Tesalonisensis 1:7) Biblia ta fala di Migel ku “si anjus” i Jesus ku “si anjus.” (Mateus 13:41; 16:27; 24:31; 1 Pedru 3:22) Suma na nin un parti, Palabra di Deus ka fala di dus izersitus di anjus fiel na seu — un ŝefiadu pa Migel i utru ŝefiadu pa Jesus — i lojiku ciga konkluson di kuma, na bardadi, Migel i Jesus Kristu na si pusison na seu. *