PA RI Biblia xa jujun taq mul kbʼix Miguel che jun uxlabʼal. Tekʼuriʼ pa ronojel wariʼ kbʼixik che tajin kubʼan jun jastaq. Pa ri wuj rech Daniel, tajin kchʼojin kukʼ ri e itzel ángeles; chupam ri wuj rech Judas, tajin kchʼojin rukʼ ri Itzel, xuqujeʼ pa ri Apocalipsis, tajin kubʼan chʼoj rukʼ ri Satanás xuqujeʼ ri itzel taq uxlabʼal. Are qas kutoʼ ri uqʼatbʼal tzij ri Ajawinel Jehová xuqujeʼ kchʼojin kukʼ ri e ukʼulel ri Dios. Rukʼ wariʼ kubʼan nim che ri ubʼiʼ, che kraj kubʼij «¿Jachin laʼ junam rukʼ ri Dios?» tekʼuriʼ, ¿jachin laʼ ri Miguel?

Chnaʼtaj chqe che e kʼo jujun winaq che xaq xiw ta jun kibʼiʼ kʼolik. Jun kʼutbʼal re, are ri Jacob, che xubʼan tat rech jun nimalaj familia, xuqujeʼ xbʼix Israel che, ri apóstol Pedro, xuqujeʼ xbʼix Simón che (Génesis 32:28; Mateo 10:2). Junam rukʼ wariʼ pa ri Biblia kʼo textos che kukʼutu che Miguel are jun chik ubʼiʼ ri Jesucristo, wariʼ kojom chik che chiʼ kʼo pa ri kaj xuqujeʼ chiʼ xtzalij pa ri kaj. Chqilaʼ pa ri Biblia jasche kqabʼij wariʼ.

Arcángel. Ri Utzij ri Dios kubʼij che ri Miguel are «ri arcángel» (Judas 9, El Nuevo Testamento en Quiché y Español, ortografía actualizada). Wajun tzij arcángel kraj kubʼij che are «kinimal ri e ángeles». Kqilo che Miguel kbʼix ri arcángel che, wariʼ kraj kubʼij che xa jun ángel je wariʼ kʼolik. Ri Biblia kukoj ta ri tzij «arcángel» chiʼ kchʼaw chkij e kʼi, are kukojo chiʼ xa kchʼaw chrij jun. Xuqujeʼ che Jesús kbʼixik, che kubʼan uchak rech arcángel. Jelaʼ kqil pa ri 1 Tesalonicenses 4:16, El Nuevo Testamento en Quiché Centro Occidental, ortografía actualizada. Chilaʼ kubʼij wi ri kubʼan ri Jesucristo chiʼ walajinaq chik: Jesús «kqaj na uloq chikaj,  katataj jun ri ko kchʼawik kuya taqanik, je jas ri kchʼaw jun arcángel». Waral kubʼij che ri Jesús kchʼaw rukʼ jun chʼabʼal rech arcángel. Rukʼ wariʼ kukʼutu che Jesús areʼ ri arcángel Miguel.

Ajkʼamal bʼe. Ri Biblia kukʼutu che are ri Miguel xuqujeʼ ri uʼángeles xechʼojin rukʼ ri dragón xuqujeʼ ri e uʼángeles xechʼojinik (Apocalipsis 12:7). Qastzij wi che Miguel are ajkʼamal bʼe chke ri ajchʼoj sukʼ taq ángeles. Ri wuj Apocalipsis xuqujeʼ kubʼij che Jesús are jun ajkʼamal bʼe chke ri ajchʼoj sukʼ taq ángeles (Apocalipsis 19:14-16). Xuqujeʼ ri apóstol Pedro qas xubʼij che ri ángeles keniman che ri Jesús (1 Pedro 3:21, 22). Rumal laʼ ri Biblia kchʼaw chrij ri Miguel xuqujeʼ ri «ajkajalaj taq taqonibʼ» xuqujeʼ kchʼaw chrij ri Jesús rukʼ ri «ajkajalaj taq toqonibʼ» (Mateo 13:41; 16:27; 24:31). Pa ri Utzij ri Dios kubʼij ta pa nijun lugar che e kʼo kebʼ jupuq ajchʼojabʼ sukʼalaj taq ángeles, che jun kukʼam kibʼe ri Miguel xuqujeʼ jun chik kukʼam kibʼe ri Jesús. Rumal laʼ che utz kbʼixik che Miguel are ri Jesucristo tajin kubʼan ri uchak pa ri kaj. *