BIBLIAQA wakin textonkunallapim willawanchik Miguel sutiyoq angelmantaqa. Daniel sutichasqa libropim willawanchik mana allin angelkunawan peleachkaqmanta. Judas sutichasqa libropiñataq willawanchik Diablowan peleachkaqmanta. Apocalipsis sutichasqa libropiñataqmi willawanchik Satanaswan hinaspa demoniokunawanpas peleachkaqmanta. Miguel sutiyoq angelqa Jehová Diospa Kamachikunanpaq derechontam defienden hinaspapas Diospa enemigonkunapa contranpim churakun. Tukuy chaykunataqa sutinpa nisqanman hinam ruran, sutinpa ninanqariki “¿Pitaq Dios hinaqa?” ninanmi. Chaynaqa, ¿pitaq Miguelqa kanman?

Manaraq chaymanta yachachkaspa wakin runakuna iskay sutiyoqkama kasqankumanta yuyarisun. Ejemplopaq, achka aylluyoq Jacobtam Israel nispa suticharqaku, apostol Pedrotañataq Simon nispa (Genesis 49:1, 2; Mateo 10:2). Chaynataqmi Bibliaqa willawanchik Jesucristopa huk kaqnin sutin Miguel kasqanta, chaymi hanaq pachapi sutinqa. Bibliatakama qawarisun imaraykum chayna sutichakusqanmanta.

Angelkunata Kamachiq. Diospa Palabranmi Miguelta sutichan “Angelkunata kamachiq” nisqa sutiwan (Judas 9). Chay ninanqa “aswan atiyniyoq angel” ninanmi. Bibliapa nisqanman hinaqa Migueltam sutichakun angelkunapa kamachiqnin sutiwan, chaynaqa huk angellam chayna kamachiqqa kanman. “Angelkunata kamachiq” nispa Bibliapi niptinqa manam achka angelkunamantachu rimachkan, aswanqa huk angellamantam. Chaymantapas Jesuspa rurasqanwanmi angelkunata kamachiqpa rurasqanqa tupan. 1 Tesalonicenses  4:16 nisqanpim qawachiwanchik Señorninchik Jesucristopa kayna rurananmanta: “Señorpunim uraykamunqa hanaq pachamanta kamachikuy qapariyninwan, angelkunata kamachiqpa qayakuyninwan”, nispa. Bibliapa nisqanman hinaqa angelkunata kamachiqpa qayakuyninwanmi Jesusqa qaparinqa. Chaynapim yachanchik kikin Jesuspuni angelkunapa kamachiqnin Miguel kasqanta.

Hanaq pachapi Tropakunapa Kamachiqnin. Bibliam willawanchik: “Miguelmi angelninkunapiwan pelearqa dragon sutiyoq animalpa contranpi. Dragonpas angelninkunapiwanmi pelearqa”, nispa (Apocalipsis 12:7). Chaynaqa, Miguelqa Diosman sonqo kaq angelkunapa Kamachiqninmi. Apocalipsis libroqa willawanchiktaqmi hanaq pachapi kaq tropakunapa Diosman sonqo angelkunapa Kamachiqnin Jesus kasqanta (Apocalipsis 19:14-16). Apostol Pablopas willawanchikmi ‘Señor Jesucristomantawan’ ‘atiy qosqan angelninkunamantawan’ (2 Tesalonicenses 1:7). Chaynaqa Bibliam willawanchik Miguelmantawan ‘angelninkunamanta’ chaynataq Jesusmantawan ‘angelninkunamantapas’ (Mateo 13:41; 16:27; 24:31; 1 Pedro 3:22). Diospa Palabranqa manam niwanchikchu Miguelpas Jesuspas hanaq pachapi Diosman sonqo kaq angelkunayoqkama kasqankutaqa. Chaynaqa Miguelqa hanaq pachapi kamachikuq Jesucristom. *