KARE te mea ora vaerua ko Mikaela e taiku maataia ana i roto i te Pipiria. Inara, me taikuia aia, te maroiroi ra aia i te rave angaanga. I roto i te puka a Daniela, te tamaki ra a Mikaela i te au angera kikino; i roto i te reta a Iuda, te tamaki ra aia ia Satani; e i roto ia Apokalupo, te tamaki ra aia i te Tiaporo e tana au temoni. Na te paruruanga i te tutara anga a Iehova e te tamaki anga i te au enemi o te Atua, te rave ra a Mikaela kia tau ki te aiteanga o tona ingoa​—“Koai Tei Aite ki te Atua?” Inara koai a Mikaela?

I tetai au taime, te kiteaia ra e tere atu i te okotai ingoa o te au tangata. Ei akaraanga, kua kitea katoaia te pateriareka ko Iakoba e ko Iseraela, e te apotetoro ko Petero, ko Simona. (Genese 49:​1, 2; Mataio 10:⁠2) Pera katoa, te akakite ra te Pipiria e ko Mikaela tetai ingoa o Iesu Karaiti, i mua ake e i muri ake i tona oraanga i te enua nei. Ka uriuri ana tatou i te au tumu i tau ki te Tuatua Tapu no te reira taopenga anga.

Angera Maata. Te taiku ra te Tuatua a te Atua ia Mikaela e ko “te angela maata.” (Iuda 9) Te akakite maira teia e te vai anake ra okotai tu angera. Te tika, te tuatua “angela maata” tei roto i te Pipiria i te tu okotai anake, kare rava i te tuatua maata. Pera katoa, te tuatuaia ra a Iesu no te taoonga o te angera maata. No runga i te Atu tei akatuia mai ko Iesu Karaiti, te akakite ra a 1 Tesalonia 4:16 e: “Ko te Atu uaorai oki te ka eke mai mei te rangi mai ma te maeva, ma te reo o te angela maata.” No reira  te reo o Iesu i akatutuia ai e no te angera maata. No reira te akaari maira teia irava e ko Iesu uaorai te angera maata ko Mikaela.

Arataki Vaeau. Te akakite maira te Pipiria ia “Mikaela e tana au angela, tamaki atura i te taae; . . . e tana au angela.” (Apokalupo 12:⁠7) No reira, ko Mikaela te Arataki o tetai vaeau angera tiratiratu. Te akatutu katoa maira a Apokalupo ia Iesu ei Arataki o tetai vaeau angera tiratiratu. (Apokalupo 19:​14-16) E te taiku tikai ra te apotetoro ko Paulo i “te Atu ra ko Iesu” e “tana au angela mana katoa ra.” (2 Tesalonia 1:7) No reira te tuatua ra te Pipiria no runga ia Mikaela e “tana au angela” e Iesu e “tana au angela.” (Mataio 13:41; 16:27; 24:31; 1 Petero 3:22) Mei te mea kare te Tuatua a te Atua i tetai ua atu ngai i akakite ana e te vai ra e rua nga vaeau angera tiratiratu i te rangi​—te mea tei aratakiia e Mikaela e tetai tei aratakiia e Iesu⁠—e mea tau kia taopenga i reira ia Mikaela e ko Iesu Karaiti tikai ia i roto i tana tuanga angaanga i te rangi. *