TSY rehafe ty Baiboly anianiany ty Anjely atao tihoe Mikaela, fa le misy raha anoe’e vaho izay rehafe’e. Amy ty boke i Daniela reke mialy amy ty anjely raty. Amy ty taratasy i Joda ao ka reke mifandietse amy i Satana. Rehafe i Apokalypsy fa mialy amy i Devoly naho ty demonia’e ka reke. Izao ty dika tihoe Mikaela: “Ia ty Mitovy Aman’Andrianagnahare?” Magneva aze ty agnara’e fa miaro ty fitondrà i Jehovah reke sady mialy amy ty fahavalo’e. Ia o Mikaela zao?

Va’e misy ndaty raike managne agnaragne maro. Isiraely ty nanognonagne i Jakoba. I Simona ty apositoly Petera. (Genesisy 49:1, 2; Matio 10:2) Rehafe ty Baiboly fa agnara i Jesosy Kirisity taolo naho tafara ty niaigna’e tambone tane etoy o Mikaela zao. Handineke ty agnazavà ty Baiboly izay tikagne.

Arikanjely. “Arikanjely” ty anognona ty Baiboly i Mikaela (Joda 9) “Filoha o Anjelio” ty dika tihoe “arikanjely.” Mirehake raha raike avao o agnaragne iohoe tie agnate Baiboly ao.  Izay ty magnamaregne fa raike avao ty arikanjely fa tsy maro. Ampifandrambesegne amy i Jesosy ka ty toeragne tana’e. Hoe ty 1 Tesalonianina 4:16: “Ty vatan-tegna i Andriatompo ro hizotso boake an-dagnitse agne le hikomandy mafe amy ty feon’arikanjely.” Izay ty magnambara fa feon’arikanjely ty feo i Jesosy. Hoe te hirehake o andalan-teny iohoe fa ty vatan-tegna i Jesosy avao o Mikaela arikanjelio.

Mpitari-tafike. Mirehake ty Baiboly fa “i Mikaela naho o anjeli’eo nifandrapake tamy i dragnogney.” (Apokalypsy 12:7) Mpitarike tafik’anjely tsy mivalike ty Mikaela. Mirehake ka ty Apokalypsy fa Mpitarike tafik’anjely tsy mivalike ty Jesosy. (Apokalypsy 19:14-16) Mirehake miomba i “Jesosy Andriatompo” naho ty “anjeli’e mahery” ka ty apositoly Paoly. (2 Tesalonianina 1:7) Sambe rehafegne agnate Baiboly ao ndra i Mikaela miharo ty “anjeli’e” ndra i Jesosy miharo ty “anjeli’e.” (Matio 13:41; 16:27; 24:31; 1 Petera 3:22) Faie tsy mirehake ty Baiboly tie misy tafik’anjely tsy mivalike roe sambe hafa ty an-dagnitse agne, ty raike tarihe i Mikaela, le ty raike tarihe i Jesosy. Mazava amy izay fa i Jesosy Kirisity tan-dagnitse agney avao o atao tihoe Mikaelao. *