ESUBANIT lomoyo loenyaritai Mikael mam atapit alimit noi Kobaibuli. Konye, nelimunitere ngesi, ejaasi nuiswamai. Kotoma oitabo loka Daniel, itijie Mikael imalaikan lukaronok; kobalua loka Yuda, engolopasi nges ka Satan; ido kotoma Apukokinio, itijei nges Ekejodijodon kede akejokin. Ne eyuwaritor ngesi apugan naka Edeke kede aitijii luka asurup ke, itodolikit Mikael apolou naka ekiror ke​—“Ingai bo Eputos ka Edeke?” Konye ingai bo Mikael?

Kanenice ejatotor itunga kede ikiroria luipu. Kwape aanyunet, enyaritai lokateker Yakob Isirael, ekiyakia Petero kwape Simon. (Ageun 49:1, 2; Matayo 10:2) Kwape kwangin, itodunit Ebaibuli ebe erai Mikael ekiror ece loka Yesu Kristo, eriko kebuno kede akaulo naka aijar ke kotoma akwap. Kaanyutu ber oni aiwadikaeta nuka Ebaibuli nu itacautos nu ebalare kwangin.

Emalaika Lokapolon. Itodunit Ebaibuli Akirot naka Edeke ebe erai Mikael “emalaika lokapolon.” (Yuda 9) Koany ebe enyaritai Mikael “emalaika lokapolon.” Itodunit na ebe ejai emailaika kwangon ediopet bon. Kabeit, akirot “emalaika lokapolon” kotoma Obaibuli itodunit ebe erai ngesi ediopet bon konye mere luipu. Kosodi bobo da, erucokitai Yesu kede adoketait naka emalaika lokapolon. Nuikaminitos loitajarutai Yesu Kristo, ebalasi 1 Isesalonikan 4:16 ebe: “Naarai edokuni Ejakait elopet abunore kotoma akuj kaiworo, keporoto loka emalaika lokapolon.” Kwangin ebakai ebe erai eporoto loka Yesu kwape loka emalaika lokapolon. Itodunit do aiwadikaet na naka Ebaibuli ebe, Yesu obe ngesi erai emalaika lokapolon.

 Ekengarenon Loka Ajore. Itetemit Ebaibuli ebe “kitiji Mikael ka ikemalaikan apiu. Koji apiu ka ikemalaikan.” (Apukokinio 12:7) Kanukangun do, erai Mikael ekengarenon loka imalaikan lumunon. Itetemit bobo eitabo loka Apukokinio Yesu kwape ekengarenon loka ajoresio nuka imalaikan lumunon. (Apukokinio 19:14-16) Ido inerit ekiyakia Paul kaidelel nuikamunitos “Ejakait Yesu” nepepe ka “imalaikan luka akepedor.” (2 Isesalonikan 1:7; Matayo 16:27; 24:31; 1 Petero 3:22) Aso inera do Ebaibuli nuikamunitos Mikael ka “ikemalaikan” ka Yesu ka “ikemalaikan.” (Matayo 13:41; 16:27; 24:31; 1 Petero 3:22) Kwape emamiar ne itodunitor akirot naka Edeke ebe ejaasi ajoresio aarei nuka imalaikan lumunon kokuju​—adiopet naingarenikit Mikael ido ace naingarenikit Yesu​—eraasi do nuecaete atemari ebe emamei bobo ice ­yeni ­erai Mikael dimarai Yesu Kristo kapolou ke naka kokuju. *