እቲ ሚካኤል ተባሂሉ ዚጽዋዕ መንፈሳዊ ፍጡር ኣብ መጽሓፍ ቅዱስ ብዙሕ ሳዕ ተጠቒሱ ኣይርከብን እዩ። እንተዀነ ግና፡ ሓደ ተግባር ብንጥፈት ኣብ ዚፍጸመሉ እዋናት እዩ ተጠቒሱ ዚርከብ። ኣብ መጽሓፍ ዳንኤል፡ ሚካኤል ምስ እኩያት መላእኽቲ ኺቃለስ ከሎ፣ ኣብ መልእኽቲ ይሁዳ፡ ምስ ሰይጣን ኪማጐት ከሎ፣ ኣብ ራእይ ከኣ፡ ምስ ድያብሎስን ኣጋንንቱን ኪዋጋእ ከሎ ተጠቒሱ ይርከብ። ሚካኤል ንግዝኣት ኣምላኽ ብምጥባቕን ምስ ጸላእቲ ኣምላኽ ብምቅላስን፡ ምስቲ “መን ከም ኣምላኽ፧” ዚብል ትርጉም ስሙ ተሰማሚዑ እዩ ዚነብር። ሚካኤል ግና መን እዩ፧

ሓድሓደ ግዜ ውልቀ ሰባት ልዕሊ ሓደ ስም ይውሃቦም ነይሩ እዩ። ንኣብነት፡ ያእቆብ እንተ ወሲድና፡ እስራኤል ተባሂሉ ይፍለጥ ነበረ፣ ሃዋርያ ጴጥሮስ እውን ስምኦን ይብሃል ነበረ። (ዘፍጥረት 49:1, 2፣ ማቴዎስ 10:2) እቲ ሚካኤል ዚብል ስም እውን የሱስ ክርስቶስ ኣብ ምድሪ ቕድሚ ምምጻኡን ድሕሪኡን ኣብ ዝነበሮ ህይወት ዚጽውዓሉ ኻልእ ስሙ ምዃኑ መጽሓፍ ቅዱስ ይሕብረና። ናብዚ መደምደምታ እዚ ኼብጽሓና ዚኽእል ቅዱስ ጽሑፋዊ ምኽንያታት እስከ ንርአ።

ሊቀ መላእኽቲ። ቃል ኣምላኽ ንሚካኤል “እቲ ሊቀ መላእኽቲ” እዩ ዚብሎ። (ይሁዳ 9) ሚካኤል ኣብዛ ጥቕሲ እዚኣ እቲ ሊቀ መላእኽቲ ተባሂሉ ኸም እተጸውዐ ኣስተብህል። እዚ ኸኣ ከምዚ ዝኣመሰለ ስልጣን ዘለዎ ሓደ መልኣኽ ጥራይ ከም ዘሎ ይሕብር። እታ “ሊቀ መላእኽቲ” እትብል ቃል እውን ኣብ መጽሓፍ ቅዱስ ብንጽል ደኣ እምበር፡ ንብዙሕ ብዜመልክት ኣገባብ ኣይተጠቕሰትን። ብዘይካዚ፡ የሱስ ምስ መዓርግ ሊቀ መላእኽቲ ተተሓሒዙ ተጠቒሱ ኣሎ። ኣብ 1 ተሰሎንቄ 4:16 ብዛዕባ እቲ ኻብ ሞት ዝተንስአ ጐይታና የሱስ ክርስቶስ፡ “ጐይታ ባዕሉ ብናይ ትእዛዝ ጻውዒት፡ ብድምጺ ሊቀ መላእኽትን ብመለኸት ኣምላኽን ካብ ሰማይ ኪወርድ እዩ” ተባሂሉ ኣሎ።  ኣብዛ ጥቕሲ እዚኣ ድምጺ የሱስ ከም ድምጺ ሊቀ መላእኽቲ ምዃኑ ተገሊጹ ኣሎ። እዛ ጥቕሲ እዚኣ እምበኣር የሱስ ባዕሉ ሚካኤል እቲ ሊቀ መላእኽቲ ምዃኑ እያ እትገልጽ።

ሓለቓ ሰራዊት። መጽሓፍ ቅዱስ፡ “ሚካኤልን መላእኽቱን ምስቲ ገበል ተዋግኡ፣ እቲ ገበልን መላእኽቱን ድማ ተዋግእዎም” ይብል። (ራእይ 12:7) ስለዚ እምበኣር፡ ሚካኤል ሓለቓ ሰራዊት እሙናት መላእኽቲ እዩ። ብዘይካዚ፡ መጽሓፍ ራእይ ንየሱስ ሓለቓ ሰራዊት እሙናት መላእኽቲ ምዃኑ ትገልጾ እያ። (ራእይ 19:14-16) ሃዋርያ ጳውሎስ እውን ን“ጐይታና የሱስ” ምስ “ሓያላት መላእኽቲ” ፈልዩ ጠቒስዎ እዩ። (2 ተሰሎንቄ 1:7) ስለዚ፡ መጽሓፍ ቅዱስ ብዛዕባ ሚካኤልን “መላእኽቱን” ከምኡ እውን ብዛዕባ የሱስን “መላእኽቱ”ን ይዛረብ እዩ። (ማቴዎስ 13:41፣ 16:27፣ 24:31፣ 1 ጴጥሮስ 3:22) ቃል ኣምላኽ ኣብ ሰማይ ሓደ ጕጅለ ብሚካኤል ዚምራሕ፡ ካልእ ጕጅለ ኸኣ ብየሱስ ዚምራሕ ክልተ ሰራዊት እሙናት መላእኽቲ ኸም ዘለዉ ስለ ዘይሕብር፡ እቲ ሚካኤል ተባሂሉ ዘሎ፡ የሱስ ክርስቶስ ሰማያዊ ግዲኡ ኣብ ዚፍጽመሉ እዋን እንተ ዘይኰይኑ ኻልእ ኪኸውን ኣይክእልን እዩ ኢልና ኽንድምድም ንኽእል ኢና። *