MAKANI AAYUNGIZYIDWE
Ino Mikayeli Angelo Simutwe Nguni?
ICILENGE camuuya ciitwa kuti Mikayeli tacaambwi ziindi zinji pe mu Bbaibbele. Nokuba boobo, lyoonse nocaambwa inga ciswaanganizyidwe acintu cimwi cicitwa. Mubbuku lya Daniele, Mikayeli ulwana bangelo babyaabi; mulugwalo lwa Juda ulakazyanya a Sataani; alimwi mubbuku lya Ciyubunuzyo ulalwana a Diabolosi amadaimona aakwe. Kwiinda mukukwabilila bweendelezi bwa Jehova alimwi akulwana basinkondo ba Leza, Mikayeli uzuzikizya icaamba izina lyakwe—ikuti “Ino Nguni Uuli Mbuli Leza?” Pele ino Mikayeli nguni?
Zimwi ziindi, bantu balazyibwa amazina manji. Mucikozyanyo, sikale Jakobo alimwi wiitwa kuti ngu Israyeli, alimwi mwaapostolo Petro wiitwa kuti ngu Simoni. (Matalikilo 49:1, 2; Matayo 10:2) Mbubwenya buyo, Ibbaibbele litondezya kuti Mikayeli ndizina limbi lya Jesu Kristo katanapona anyika alimwi akaponede kale. Atulange-lange twaambo twamu Magwalo ncotwaakosola boobo makani.
Angelo Simutwe. Ijwi lya Leza lilaamba kujatikizya Mikayeli “angelo simutwe.” (Juda 9) Eeci caamba “mungelo mupati.” Mu Bbaibbele, ikaambo kakuti “angelo simutwe” kaambwa buyo kujatikizya muntu omwe ikutali bantu banji pe. Eeci citondezya kuti kuli buyo mungelo omwe uuli boobo. Kunze lyaboobo, Jesu uliswaangene acuuno camungelo simutwe. Ikujatikizya Mwami Jesu Kristo wakabusyigwa, ilugwalo lwa 1 Ba-Tesalonika 4:16 lwaamba kuti: “Mwami mwini uyooseluka kuzwa kujulu amukunga ajwi lyaangelo simutwe.” Ijwi lya Jesu lipandululwa kuba lyaangelo simutwe. Aboobo lugwalo oolu lutondezya kuti Jesu lwakwe ngo Mikayeli angelo simutwe.
Musololi Wabasikalumamba. Ibbaibbele lyaamba kuti “Mikayeli abaangelo bakwe bakalwanisya simwaaba . . . abaangelo bakwe.” (Ciyubunuzyo 12:7) Aboobo Mikayeli Mmusololi wabangelo basilumamba ibasyomeka. Ibbuku lya Ciyubunuzyo alimwi lipandulula Jesu kuti Mmusololi wabangelo basilumamba basyomeka. (Ciyubunuzyo 19:14-16) Alimwi mwaapostolo Paulo cacigaminina waamba “Mwami Jesu” antoomwe “abaangelo bakwe basinguzu.” (2 Ba-Tesalonika 1:7; Matayo 16:27; 24:31; 1 Petro 3:22) Aboobo Bbaibbele lilaamba kujatikizya Mikayeli antoomwe “abaangelo bakwe” alimwi a Jesu a “baangelo bakwe.” (Matayo 13:41) Mbwaanga kunyina Jwi lya Leza nkolitondezya kuti kuli nkamu zyabaangelo basikalumamba basyomeka zyobile kujulu—imwi iisololelwa a Mikayeli aimbi a Jesu—cileelela makani aaya kwaakosola kuti Mikayeli ngo Jesu Kristo nacita mulimo wakwe kujulu. *
^ munc. 1 Imakani aambi aatondezya kuti izina lyakuti Mikayeli lyaamba Mwana a Leza alajanika mubbuku lya Insight on the Scriptures, Bbuku 2 apeeji 393-4 alimwi alya Kukambitsirana za m’Malemba apeeji 432-3, aakamwaigwa a Bakamboni ba Jehova.
