A XIVANGWA xa moya lexi xi vitwako Mikaeli a xi kumbukiwi a makhati yo tala lomu ka Biblia. Hambulezo, a xikhati xi kumbukiwako, xi kumeka na xi maha zo kari. Lomu bhukwini ga Danieli, Mikaeli olwa ni tingelosi to biha; lomu papilweni ga Juda, yena i kumeka na a kanetana na Satani; niku lomu ka Kuvululelwa, olwa yimpi na Diyabu zinwe ni madimoni yakwe. Hi kota ya lezi a yimelako a wuhosi ga Jehova ni lezi a lwako ni valala va Nungungulu, Mikaeli i hanya hi kuyelana ni tlhamuselo wa vito gakwe — “Himani A Fanako Na Nungungulu?” Kanilezi himani Mikaeli?

A zikhati zinwani, a vanhu va tiviwa hi mavito yo tala. Hi xikombiso, a hloko ya lixaka Jakobe i tiviwawu kota Israeli, niku mupostoli Pedro, i tiviwawu kota Simoni. (Genesisi 49:1, 2; Mateu 10:2) Hi kufanana, a Biblia gi komba lezaku Mikaeli hi ginwani vito ga Jesu Kristu, a mahlweni ni nzhako ka kuhanya kakwe misaveni. A hi kambisiseni a zigelo za lomu Mitsalweni lezi zi hi mahako hi chikelela a magumo lawo.

Ngelosi ya hombe. A Mhaka ya Nungungulu yi wulawula hi Mikaeli “a ngelosi ya hombe.” (Juda 9) A magezu lawo ma wula ku ngalo “murangeli wa tingelosi.” Wona lezaku Mikaeli i vitwa a ngelosi ya hombe. Lezo zi komba lezaku ku na ni ngelosi yinwe ntsena yi nga ni vito lego. Hakunene, a magezu “ngelosi ya hombe” ma kumeka lomu ka Biblia na ma wula a ngelosi yinwe ntsena, cima a ma wuli tingelosi to tala. Ahandle ka lezo, Jesu i zwananisiwa ni xikhundla xa ngelosi ya hombe. Na gi wulawula hi Hosi Jesu Kristu a vuxilweko hi ka vafileko, a bhuku ga 1 Va Le Tesalonika 4:16 gi ngalo: “Yona Hosi wutsumbu yi ta relela hi le tilweni hi huwa yi leletelako, ku zwala a gezu ga ngelosi ya hombe.” Makunu a gezu ga Jesu gi kombisiwa  kota gezu ga ngelosi ya hombe. Hikwalaho a mutsalo lowu wu komba lezaku Jesu wutsumbu hi yena a ngelosi ya hombe Mikaeli.

Murangeli wa Butho. A Biblia gi wula lezaku “Mikaeli ni tingelosi takwe va yalwa na drako, . . . na hi ni tingelosi takwe.” (Kuvululelwa 12:7) Hizalezo, Mikaeli hi yena Murangeli wa butho ga tingelosi to tsumbeka. A bhuku ga Kuvululelwa gi wulawula kambe hi Jesu kota Murangeli wa butho ga tingelosi to tsumbeka. (Kuvululelwa 19:14-16) Niku mupostoli Paule hi kukongoma i wulawula hi “Hosi Jesu” ni “tingelosi ta ntamu wakwe.” (2 Va Le Tesalonika 1:7; Mateu 16:27; 24:31; 1 Pedro 3:22) Makunu a Biblia gi wulawula hi Mikaeli ni “tingelosi takwe” na Jesu ni “tingelosi takwe.” (Mateu 13:41) Kota lezi ku nga hiko kona lomu a Mhaka ya Nungungulu yi kombako lezaku ku na ni varangeli vambiri va mabutho ya tingelosi to tsumbeka le tilweni — ginwe gi rangelwako hi Mikaeli ni ginwani gi rangelwako hi Jesu — ​za hehuka a ku chikelela a magumo ya lezaku hakunene Mikaeli hi Jesu Kristu ntirweni wakwe wa le tilweni. *