EBYONGIRWEHO
Mikaeri Maraika Omukuru Nuwe Oha?
EKIHANGIRWE eky’omwoyo ekyetwa Mikaeri tikibazibwaho muno omu Baibuli. Kyonka obw’abazibwaho, aba aina eky’akukora. Omu kitabu kya Danieri, Mikaeri narwana n’abamaraika ababi; omu bbaruha ya Yuda nahakana na Setani; kandi omu Okusuku’rwa narwana n’Omuhangirizi n’abadaimoni be. Omu kurwani’ra obulemi bwa Yahwe narwanisa abanyanzigwa ba Ruhanga, Mikaeri ahikanira kimu nibara lye erikumanyisa, “Noha ali nka Ruhanga?” Baitu Mikaeri nuwe oha?
Obundi abantu baba n’amabara agakukira omu limu. Nk’eky’okurorraho, Yakobo amanyirwe nka Isareri, kandi omukwenda Petero nka Simoni. (Okubanza 49:1, 2; Matayo 10:2) Omu mulingo nugwo gumu Baibuli eyoleka ngu Mikaeri, ibara erindi erya Yesu Kristo, eri yayetwaga atakazairwe omu nsi n’obu yagarukire omuiguru. Ka turole obulyo kuruga omu byahandiikirwe nambere tukusigiki’ra kugamba tutyo.
Maraika Omukuru. Ekigambo kya Ruhanga kibaza hali Mikaeri “maraika omukuru.” (Yuda 9) Ekigambo kinu kimanyisa “mukuru w’abamaraika.” Wetegereze ngu Mikaeri nayetwa mukuru w’abamaraika. Kinu kikwoleka ngu haloho maraika ow’omulingo gunu omu wenka. Omu Baibuli ekigambo “mukuru w’abamaraika” kyoleka ngu ali maraika omu wenka hatali baingi. Kandi, Yesu nuwe akwatanizibwa n’obukuru bunu. Nirubaza hali Mukama waitu Yesu Kristo ayahumbwirwe, 1 Abasesalonika 4:16 rugamba: “Baitu Mukama waitu wonyini alisirimuka kuruga omuiguru, nokugambira haiguru niraka lya maraika omukuru.” Iraka lya Yesu hanu likubazibwaho nka iraka lya maraika omukuru. Nahabwekyo ekyahandiikirwe kinu nikimanyisa ngu Yesu wonyini nuwe Mikaeri, maraika omukuru.
Omukuru w’ihe. Baibuli egamba ngu: “Mikaeri n’abamaraika be nibaramaga kurwana n’ekijoka. . . . nabamaraika bakyo.” (Okusuku’rwa 12:7) Nahabwekyo, Mikaeri nuwe mwebembezi w’ihe ry’abamaraika abesigwa. Okusuku’rwa nakwo kusoborra Yesu nk’omwebembezi w’ihe ry’abamaraika abesigwa. (Okusuku’rwa 19:14-16) N’omukwenda Paulo amubazaho ati: “Mukama waitu Yesu” na ‘bamaraika b’amaani ge.’ (2 Abasesalonika 1:7) Nahabwekyo Baibuli ebaza ha Mikaeri hamu “nabamaraika be” na Yesu hamu “nabamaraika be.” (Matayo 13:41; 16:27; 24:31; 1 Petero 3:22) Okusigiki’ra nkoku hataroho hali ekigambo kya Ruhanga kyolekera ngu haroho amahe g’emirundi ebiri aga bamaraika abesigwa omuiguru—erimu niryebemberwa Mikaeri kandi erindi Yesu—kikweyoleka kurungi ngu Mikaeri tali ondi kwihaho, nuwe Yesu Kristo ali omu kikaro eky’omuiguru. *
^ kac. 6 Ebikukiraho ebikwoleka ngu ibara Mikaeri ly’omwana wa Ruhanga osobora kubisanga omu kitabu ekya Insight on the Scriptures Omuzingo 2, empapura 393-4, ekyatiirwe Abakaiso ba Yahwe.
