AITA te varua parauhia Mikaela e faahiti-pinepine-hia ra i roto i te Bibilia. Ia faahitihia râ oia, te haa ra oia. I roto i te buka a Daniela, te aro ra Mikaela i te mau melahi ino; i roto i te rata a Iuda, te mârô ra oia e o Satani; e i roto i te Apokalupo, te tama‘i ra oia i te Diabolo e ta ’na mau demoni. Ma te paruru i te faatereraa a Iehova e ma te aro i to te Atua mau enemi, te faaau ra Mikaela ia ’na iho i nia i te auraa o to ’na i‘oa—“O vai tei au i te Atua?” Teie râ, o vai o Mikaela?

I te tahi taime, ua matauhia te tahi mau taata na roto i te tahi atu i‘oa. Ei hi‘oraa, ua matau-atoa-hia te patereareha Iakoba o Iseraela, e te aposetolo Petero o Simona. (Genese 49:1, 2; Mataio 10:2) Oia atoa, te faaite ra te Bibilia e o Mikaela te tahi atu i‘oa o Iesu Mesia, na mua ’‘e e i muri a‘e i to ’na oraraa i te fenua nei. E hi‘o mai tatou i te mau tumu Bibilia e huti ai tatou i taua faaotiraa ra.

Melahi rahi. Te faahiti ra te Parau a te Atua ia Mikaela “te melahi rahi.” (Iuda 9) A tapao na e te parauhia ra Mikaela te melahi rahi. Te auraa ïa, hoê ana‘e melahi mai tera. Oia mau, e huru otahi noa ia faahitihia te ta‘o “te melahi rahi” i roto i te Bibilia, e ere roa ’tu i te huru otini. Hau atu â, ua taaihia Iesu i te tiaraa melahi rahi. Teie ta te Tesalonia 1, 4:16 e parau ra no nia i te Fatu ra o Iesu Mesia tei faatiahia mai: “O te Fatu iho hoi te pou mai mai te ra‘i mai, ma te umere, ma te reo o  te melahi rahi.” Te faataahia ra ïa to Iesu reo mai to te hoê melahi rahi. Te faataa ra ïa teie irava e o Iesu iho te melahi rahi ra o Mikaela.

Aratai nuu. Te parau ra te Bibilia e “o Mikaela e ta ’na ra mau melahi tama‘i atura i te teni . . . e ta ’na ra mau melahi.” (Apokalupo 12:7) No reira, o Mikaela te Aratai o te hoê nuu melahi haapao maitai. Te faataa atoa ra te Apokalupo ia Iesu mai te hoê Aratai o te hoê papaupea, aore ra nuu, melahi haapao maitai. (Apokalupo 19:14-16) E te faahiti roa ra te aposetolo Paulo i “te Fatu ra o Iesu” e “tana mau melahi mana.” (Tesalonia 2, 1:7) Te faahiti ra ïa te Bibilia ia Mikaela e “ta ’na ra mau melahi” e ia Iesu atoa e “ta ’na ra mau melahi.” (Mataio 13:41; 16:27; 24:31; Petero 1, 3:22) I te mea e aita te Parau a te Atua e faaite noa ’‘e ra e te vai ra e piti nuu melahi haapao maitai i nia i te ra‘i—hoê arataihia e Mikaela e hoê arataihia e Iesu—e mea tano ïa ia faaoti e o Iesu Mesia mau â o Mikaela i nia i to ’na tiaraa i te ra‘i. *