МИКАИЛ дәп аталған роһаний шәхс Муқәддәс Китапта наһайити аз тилға елинған. Бирақ, у һәр қетим тилға елинғанда наһайити қизғин иш қиливатқан, йәни Даниял қисмида, Микаил билән яман пәриштәләр җәң қиливатқан; Йәһуданиң хетидә, Микаил билән Шәйтан бәс-муназирә қиливатқан; һәм Вәһийләр қисмида, Микаил билән Шәйтан вә Шәйтанға әгәшкүчи җинлар уруш қиливатқан тәсвирләр баян қилинған. Микаил Худаниң дүшмәнлири билән җәң қилип Йәһвә Худаниң һөкүмранлиқ һоқуқини қоғдап өз исминиң мәнасиға мунасип иш қилған. Микаил дегән бу исимниң мәнаси “Ким Худаға охшаш?” Ундақта Микаил ким?

Муқәддәс Китапта, бәзи шәхсләр бир нәччә исим билән аталған. Мәсилән, аилә йәни қәбилә башлиғи Яқупниң йәнә Исраил дегән исими бар, шагирт Петрусниң Симун дегән исми бар (Яритилиш 49:1, 2; Мәтта 10:2). Шуниңға охшаш, Муқәддәс Китап Әйса Мәсиһ йәр йүзигә келиштин авал вә асманға қайтқандин кейин униң башқа исми Микаил екәнлигини көрситиду. Мошу хуласә Муқәддәс Китапта хатириләнгән төвәндики мәлуматларға асасланған.

Баш периштә. Муқәддәс Китап Микаилни “баш пәриштә” дегән (Йәһуда 9). Микаилниң баш периштә дәп аталғанлиғиға диққәт қилсақ, униңдәк периштәдин пәқәт бирила барлиғини көрәләймиз. Әмәлиятта, “баш периштә” дегән бу уқум Муқәддәс Китапта һәргиз көплүк шәклидә әмәс, бәлки пәқәт бирлик шәкилдә учрайду. Униң үстигә, Әйса Мәсиһ билән баш пәриштәниң орни бағлинишлиқ. Өлүмдин тирилгән Мәсиһ һәққидә Салоникилиқларға 1-хәт 4:16 айәттә Мәсиһ “Өзи бир пәрман  арқилиқ баш пәриштәниң авази... билән асмандин чүшиду” дейилгән. Әйсаниң авази баш пәриштәниң авази билән охшаш дәп тәсвирләнгән. Шуңа мошу айәт Әйсаниң өзи баш пәриштә Микаил екәнлигини көрситиду.

Асмандики қошунниң сәркәрдиси. Муқәддәс Китапта “Микаил вә униң периштәлири әҗдиһаға қарши җәң қилди. Әждиһаму өз пәриштәлири билән уларға етилди” дәп баян қилинған (Вәһийләр 12:7). Мошуниңдин көрүвелишқа болидуки, Микаил садақәтмән пәриштәләр қошуниниң сәркәрдиси. Вәһийләрдә Әйса һәм садақәтмән пәриштәләр қошуниниң сәркәрдиси дәп тәсвирләнгән (Вәһийләр 19:14—16). Йәнә әлчи Павлус “Әйса” вә униң қудрәтлик “пәриштәлири”ни ениқ тилға алған (Салоникилиқларға 2-хәт 1:7). Мундақчә қилип ейтқанда, Муқәддәс Китап Микаил вә “униң пәриштәлири” йәнә Әйса вә “униң периштәлири”ни тилға алған (Мәтта 13:41; 16:27; 24:31; Петрусниң 1-хети 3:22). Муқәддәс Китапниң һеч қандақ бир айитидә асманда икки садақәтмән пәриштәләр қошуни бар, бириниң сәркәрдиси Микаил йәнә бириниң сәркәрдиси Әйса дәп көрситилмигән. Шундақ екән, Микаил әмәлиятта асманға қайтип вәзипә өтәватқан Әйса Мәсиһ дәп хуласә чиқириш мувапиқ *.