BIVHILI a i anzeli u amba nga ha tshivhumbiwa tsha muya tshine tsha pfi Mikaele. Naho zwo ralo, musi i tshi amba nga hatsho, tshi vha tshi tshi khou ita zwiṅwe zwithu. Kha bugu ya Daniele, Mikaele u vha a tshi khou lwa na vharuṅwa vhavhi; kha luṅwalo lwa Yuda, u vha a tshi khou hanedzana na Sathane; nahone kha Ndzumbululo, u vha a tshi khou lwa na Diabolo na madimoni awe. Nga u lwela vhuvhusi ha Yehova na u lwa na maswina a Mudzimu, Mikaele u tshila u tendelana na zwine dzina ḽawe ḽa amba zwone—“Ndi Nnyi ane a Fana na Mudzimu?” Fhedzi Mikaele ndi nnyi?

Nga zwiṅwe zwifhinga, vhathu vha a ḓivhiwa nga maṅwe madzina. Sa tsumbo, musimulalushaka Yakobo u dovha a ḓivhiwa nga ḽa Isiraele, nahone Petro u dovha a ḓivhiwa sa Simoni. (Genesi 49:1, 2; Mateo 10:2) Nga hu fanaho, Bivhili i sumbedza uri ḽiṅwe dzina ḽa Mikaele ndi Yesu Kristo, musi a sa athu u bebiwa sa muthu wa ṋama na musi o no fa kha ḽifhasi. Kha ri ṱhogomele zwiitisi zwa Maṅwalo zwine zwa ita uri ri swikelele kha yeneyo phetho.

Muruṅwa muhulwane. Ipfi ḽa Mudzimu ḽi amba nga ha Mikaele uri ndi “muruṅwa muhulwane.” (Yuda 9) Ṱhogomelani uri Mikaele  u vhidzwa muruṅwa muhulwane. Zwenezwi zwi sumbedza uri hu na muruṅwa muthihi fhedzi o raloho. Zwi re zwone ndi uri ipfi “muruṅwa muhulwane” Bivhilini ḽi bvelela ḽi kha vhuthihi, hu si kha vhunzhi. Zwiṅwe-hafhu, Yesu u ṱumanywa na vhuimo ha u vha muruṅwa muhulwane. Malugana na Murena Yesu Kristo o vuswaho, 1 Vha-Thesalonika 4:16 i ri: “Ene muṋe Murena, musi hu tshi pfala mukosi wa u khura na ipfi ḽa muruṅwa muhulu.” Ngauralo ipfi ḽa Yesu ḽi ṱaluswa sa ḽa muruṅwa muhulu. Nga zwenezwo lwonolu luṅwalo lu sumbedza uri Yesu ene muṋe ndi muruṅwa muhulwane ane a vha Mikaele.

Murangaphanḓa wa Mmbi. Bivhili i amba uri “Mikaele na vharuṅwa vhawe vha tshi lwa na ḽiḽa ḽigweṋa. . . . na vharuṅwa vhaḽo.” (Ndzumbululo 12:7, maḽeḓeretsendama ndi ashu.) Ngauralo, Mikaele ndi Murangaphanḓa wa mmbi ya vharuṅwa vha fulufhedzeaho. Ndzumbululo i dovha ya ṱalusa Yesu sa Murangaphanḓa wa mmbi ya vharuṅwa vha fulufhedzeaho. (Ndzumbululo 19:14-16) Nahone muapostola Paulo o amba nga ho livhaho nga ha “Murena Yesu” na “vharuṅwa [vhawe] vha maanḓa.” (2 Vha-Thesalonika 1:7) Ngauralo Bivhili i amba nga ha Mikaele na “vharuṅwa vhawe” na Yesu na “vharuṅwa vhawe.” (Mateo 13:41; 16:27; 24:31; 1 Petro 3:22) Samusi hu si na fhethu hune Ipfi ḽa Mudzimu ḽa sumbedza uri hu na mmbi mbili dza vharuṅwa vha fulufhedzeaho ṱaḓulu—iṅwe ine ya rangwa phanḓa nga Mikaele na iṅwe ine ya rangwa phanḓa nga Yesu—zwi tou pfala uri ri nga phetha nga ḽa uri Mikaele ndi Yesu Kristo vhuimoni hawe ṱaḓulu. *