TE TAHI ’U FAKAMAHINO
Ko Ai Te Alekaselo Ko Mikaele?
’E MOLE faka’aoga’i tu’uma’u ’i te Tohi-Tapu ia te higoa ’o te ’āselo ko Mikaele. Kae ’i te ’u temi ’aē ’e talanoa ai ki ai, ’e talanoa ki te ’u gāue ’aē ’e ina fai. ’I te tohi ’o Taniela, ’e ’ui ai ’e fehōkosi ia Mikaele mo te kau ’āselo agakovi; ’i te tohi ’o Suta, ’e talanoa ai ki tana fihi mo Satana; pea ’i te tohi ’o Apokalipesi, ’e fakamatala ai tana tau’i ia te Tevolo pea mo tana kau temonio. ’I tana lagolago ki te pule fa’italiha ’a Sehova pea mo tana tau’i te ’u fili ’o te ’Atua, ’e mulimuli pe ia Mikaele ki te ’uhiga ’o tona higoa—“Ko Ai ’e Hage Ko Te ’Atua?” Kae ko ai koa ia Mikaele?
’I ’ihi temi, ko te haha’i ’e ’i ai tonatou tahi ’u higoa. Ohage ko te pateliaka ko Sakopo, ne’e toe higoa’i ko Iselaele, pea ko te ’apositolo ko Petelo ne’e ko Simone. (Senesi 49:1, 2; Mateo 10:2) Pea ’e fakahā ’i te Tohi-Tapu, ko Mikaele ne’e ko te higoa ’aia ’o Sesu Kilisito ’i mu’a ’o tana mavai mai te lagi pea mo te temi ’aē ne’e mavae ai ’i te kele. Tou vaka’i age mu’a te ’u fakamo’oni faka Tohi-Tapu ’o ’uhiga mo te higoa ’aia.
Alekaselo. ’E ’ui ’i te Folafola ’a te ’Atua ko Mikaele ’e ko “te alekaselo.” (Suta 9) Ko tona faka ’uhiga ko “te ’āselo pule.” Koutou fakatokaga’i ko Mikaele ’e fakahigoa’i ko te alekaselo. ’E mahino mai ’e ko te alekaselo pe e tahi, pea ’i te Tohi-Tapu, ’e faka’aoga’i pe te kupu “alekaselo” ki te tokotahi. Tahi ’aē, ’e faka ’uhiga te tu’ulaga alekaselo kiā Sesu. ’O ’uhiga mo te Aliki Sesu Kilisito ’aē ne’e fakatu’uake, ’e ’ui iā 1 Tesalonika 4:16 (MN): “Ko te ’Aliki totonu, ’aki he pāui faka pule, ’aki he le’o faka alekaselo…’e hifo anai mai te lagi.” Koia, ’e ’ui ko te le’o ’o Sesu ’e ko te le’o ’o te alekaselo. Pea ’e fakahā ’i te vaega ’aia ko Sesu totonu ’e ko te alekaselo ko Mikaele.
Ko Te Pule Takitaki ’o Te Kautau. ’E ’ui ’i te Tohi-Tapu ko “Mikaele mo tana kau ’āselo ne’e nātou tau’i te talakone…mo tana kau ’āselo.” (Apokalipesi 12:7, MN) Koia, ko Mikaele ’e ko te Pule Takitaki ’o te kautau ’āselo agatonu. ’E toe ’ui ’i te tohi ’o Apokalipesi, ko Sesu ’e ko te Pule Takitaki ’o te kautau ’āselo agatonu. (Apokalipesi 19:14-16) Pea ko te ’apositolo ko Paulo ’e talanoa ’o ’uhiga mo “te ’Aliki ko Sesu” pea mo “tana kau ’āselo mālohi.” (2 Tesalonika 1:7, MN) Koia ’i te Tohi-Tapu ’e talanoa kiā Mikaele pea mo “tana kau ’āselo,” pea kiā Sesu mo “tana kau ’āselo.” (Mateo 13:41, MN; Mateo 16:27, MN; 24:31, MN; 1 Petelo 3:22) ’E tou ’ui ai fakahagatonu ko Mikaele ’e ko Sesu Kilisito ’i tona tu’ulaga ’aē ’i selo, he’e mole talanoa ’i te Folafola ’a te ’Atua ki he ’u fo’i kautau ’āselo agatonu e lua ’i te lagi—ohage ko he kau ’āselo ’e takitaki e Mikaele pea mo he tahi kau ’āselo ’e takitaki e Sesu.*
* Kapau ’e koutou fia ma’u he tahi ’u fakamahino ki te ’ui ’aē ko te higoa ko Mikaele ’e faka ’uhiga ki te ’Alo ’o te ’Atua, pea koutou vaka’i te Lua Tohi Étude perspicace des Écritures, ’i te pasina 280 mo te 281, ne’e tā e te kau Fakamo’oni ’a Sehova.