CAKUPANGANYIKWA causimu cakolanjikwa Mikaele ŵangacisala kaŵilikaŵili m’Baibulo. Nambope, akusacisalaga naga cikukamula masengo ganegakwe. Mwambone, buku ja Danieli jikusasala ya Mikaele ali mkumenyana ni malayika gakusakala; cikalata ca Yuda, cikusasala ya jwalakwe ali mkukangana ni Satana; soni buku ja Ciunukuko, jikusasala ya Mikaele ali mkuputa ngondo ni Satana, soni misimu jakusakala. Pakuŵicila kunyuma ulamusi wa Yehofa, soni kumenyana ni acimmagongo ŵa Mlungu, Mikaele akusatendaga yakamulana ni lina lyakwe lyalikusagopolela kuti, “Ŵani Ŵali Mpela Mlungu?” Nambo, ana Mikaele ali ŵani?

Ndaŵi sine, mundu akusaŵilanjikwaga ni mena gejinji. Mwambone, nangolo Yakobo akusaŵilanjikwasoni kuti Isalayeli, soni ndumetume Petulo ndaŵi sine akusaŵilanjikwa kuti Simoni. (Genesis 49:1, 2; Matayo 10:2) M’yoyosoni, Baibulo jikusalosya kuti Mikaele lili lina line lya Yesu Klistu liŵakolanjikwaga nalyo mkanayice pacilambo capasi, soni ali awujile kwinani. Kwende tulole magongo ga m’Malemba pa ngani jeleji.

 Jwamkulungwa jwa Malayika. Maloŵe ga Mlungu gakusasala kuti Mikaele ali “jwamkulungwa jwa malayika.” (Yuda 9) Yeleyi yikulosya kuti jwamkulungwa jwa malayika apali jumope. Mwambone, m’Baibulo linali likusakolanjikwa mwakulosya kuti lili lya lilayika limo, ngaŵaga lya malayika gejinji. Konjecesya pelepa, Yesu ni jwakwete ukumu wakuŵa jwamkulungwa jwa malayika. Pakusala ya Ambuje Yesu Klistu ŵaŵajimwice ku ŵawe, lilemba lya 1 Atesalonika 4:16 likusati: “Tipaciŵa kubangula kwa maloŵe ga jwamkulungwa jwa malayika ni jwa lipenga lya Mlungu. Ni ndaŵi jelejo Ambuje msyene taciyika kutyocela kwinani.” Pelepa maloŵe ga Yesu akugasala kuti gali ga jwamkulungwa jwa malayika. M’yoyo, lilembali likulosya kuti Yesu ali Mikaele, jwamkulungwa jwa malayika.

Mlongola jwa Likuga lya Ngondo. Baibulo jikusasala kuti “Mikaele ni malayika gakwe ŵaliji mkumenyana ni cingwena . . . ni malayika gakwe.” (Ciunukuko 12:7) M’yoyo Mikaele ali Mlongola jwa likuga lya ngondo lya malayika gakulupicika. Buku ja Ciunukuko jikusasalasoni kuti Yesu ali Mlongola jwa likuga lya ngondo lya malayika gakulupicika. (Ciunukuko 19:14-16) Nombe najo ndumetume Paulo ŵasasile ya “Ambuje Yesu” ni “malayika gawo ga macili.” (2 Atesalonika 1:7; Matayo 16:27; 24:31; 1 Petulo 3: 22) M’yoyo Baibulo jikusasala ya Mikaele ni “malayika gakwe,” soni Yesu ni “malayika gakwe.” (Matayo 13:41) Nambo Maloŵe ga Mlungu gangalosya palipose kuti kwinani kwana makuga gaŵili ga ngondo ga malayika gakulupicika, limo kuŵaga lyakulongolelekwa ni Mikaele, soni line ni Yesu. M’yoyo mpaka tujile kuti Mikaele ali Yesu Klistu mu ukumu wakwe wa kwinani.