(APÉNDICE) NI ZEEDA LU RIʼ
Tuu nga Miguel, ángel ni jma nandxóʼ
LU CHUPA chonna si libru stiʼ Biblia cayeeteʼ de ti espíritu láʼ Miguel. Guiráʼ ra cuzeeteʼ Biblia laabe nuu ni cayúnibe. Lu libru stiʼ Daniel, cadxelasaabe caadxi ángel malu; lu carta bicaa Judas cadinde diidxabe né Binidxabaʼ ne lu libru stiʼ Apocalipsis cadxelasaabe Binidxabaʼ ne ca demonio stiʼ. Lu cani bizéʼtenu ca, rihuinni nabé cudxiilube ca xhenemigu Dios purtiʼ Jiobá si nga napa derechu guni mandar casi Rey. Ra rúnibe nga la? rusisácabe labe ni riníʼ: «Tuu Nga Casi Dios». Yanna, tuu nga Miguel ni cuzéʼtenu ca yaʼ.
Ante guidúʼyanu tu laabe, naquiiñeʼ guietenaláʼdxinu nuu tiru rapa binni chupa lá. Casi Jacob, ti hombre ni guca xaíque stiʼ ti familia naroʼbaʼ, laaca gúdxicabe laa Israel ne apóstol Pedru gúdxicabe laa Simón (Génesis 49:1, 2; Mateo 10:2). Zaqueca nga riníʼ Biblia de Jesucristu, ruzeeteʼ ni Miguel nga sti labe cásica ante gueedabe lu Guidxilayú riʼ ne ngueca nga labe dxi bibiguétabe guibáʼ. Guidúʼyanu xi razón cudii Biblia laanu para guininu zacá.
Ángel ni jma nandxóʼ (Arcángel). Stiidxaʼ Dios na Miguel nga «ángel ni jma nandxóʼ» (Judas 9). Lu diidxaʼ ra gucuá Biblia ca primé, ti ángel si nga caníʼ ni lá zacá. Ne laaca cá lu Biblia cayuni Jesús dxiiñaʼ ni runi ángel ni jma nandxóʼ. Zacá ridúʼyanu lu textu ra culuíʼ xi chiguni Jesucristu ni biasa lade gueʼtuʼ: «Señor nga ziete de guibáʼ ne ti ridxi stiʼ ni runi mandar, ne ridxi stiʼ ángel ni jma nandxóʼ» (1 Tesalonicenses 4:16, TNM). Ca diidxaʼ riʼ cusihuinni cani zaníʼ Jesús né ridxi stiʼ ángel ni jma nandxóʼ. Nga runi, laani rusihuinni ni Jesús nga Miguel, ángel ni jma nandxóʼ que.
Xaíque stiʼ ca ángel. Biblia na «bicaa lú Miguel [...] ne ca xpinni» ne «laca bicaa lú dragón ne ca xpinni» (Apocalipsis 12:7). Raríʼ rihuinni Miguel nga Xaíque stiʼ ca ángel ca. Libru stiʼ Apocalipsis laaca culuíʼ ni Jesús nga Xaíque stiʼ stale ángel ni ruzuubaʼ stiidxabe (Apocalipsis 19:14-16). Ne apóstol Pedru bizeeteʼ Jesús ne ca ángel stiʼ (1 Pedro 3:22). Ndiʼ rusiene laanu cuzeeteʼ Biblia de Miguel ne ca «ángel» stiʼ ne laaca cuzeeteʼ ni de Jesús ne ca «ángel» stiʼ (Mateo 13:41; 16:27; 24:31). Nin ti lugar cadi caníʼ diʼ lu Stiidxaʼ Dios nuu chupa neza ángel, ti neza ni ruzuubaʼ stiidxaʼ Miguel ne sti neza ni ruzuubaʼ stiidxaʼ Jesús. Nga runi, zanda guidúʼyanu laaca Miguel nga Jesucristu ni cayuni xhiiñaʼ guibáʼ. *
^ párrafo 1 Zadxélaluʼ xcaadxi ra caníʼ Xiiñiʼ Dios nga Miguel lu vol. 2, yaza 386, 387, stiʼ Perspicacia para comprender las Escrituras, stiʼ ca testigu stiʼ Jiobá.
