ZIAZIA KEKEAPAI afuranga gbe tipa gu boro nga Mikaere te. Ono ho si nafura ni tipa ko, si fura tipa ko ko kidu tingba sunge. I fura tipa ko rogo gu kitabu nga Daniere ko nisovura na gbegberẽ amaraika; rogo gu waraga Yuda akehe ko nitikango na Satana; rogo Yugoti ko nisovura na Bakitingbanga na gako adaimona. Ho Mikaere asovura ni kuti avura Mbori ka songoda ga Mbori zogarago, gure nga ko namangapai na ngbanya na rogo rimoko yo, nga “Da Duwa Mbori?” Ono da du nga Mikaere?

Dungu aboro du na arimo kuriyo ue watadu susi ue. Ni kpiapai, gu iriiri bakumba nangia Yakobo adu na gu kura rimoko nga Yisaraere, na kura rimo gu mokedi nangia Petero angia Simona. (Bambata Pai 49:1, 2; Matayo 10:2) Wakina gure a, Ziazia Kekeapai nayugo gupai nga Mikaere nga kura rimo Yesu Kristo, mbata fu ko ye ku sende no na fuo gako ku ngbangbaturũ yo. Ani bingo agu apai nayugoho nga wo duhe.

Bakumba maraika. Ziazia Kekeapai nafura tipa Mikaere “bakumba maraika.” (Yuda 9) Mo bi gupai nga i nayamba Mikaere nga bakumba maraika. Ziazia Kekeapai nafura tipa bakumba maraika gbua kina sa, angianga i ni ngengeyo ya. Kurigure, Yesu nga gu boro i aringbisa pani ni gu boro du kurii amaraika dũ. Ziazia Kekeapai nape pa Gbia Yesu Kristo kini ya: “Gbia nikazorã tigako ngbangbaturũ yo, na bakere tata ngba na fugo bakumba maraika.” (1 ATesaroniko 4:16) I nape pa fugo Yesu ki ya si nga fugo bakumba maraika. Gi veresi re nayugo gupai nga kina Yesu du nga Mikaere bakumba maraika.

Baira abasovura. Ziazia Kekeapai naya wẽ ‘Mikaere na gako amaraika asovura na daragona na gako amaraika.’ (Yugoti 12:7) Gere nayugo gupai nga Mikaere nga Baira gu ruru amaraika nga abasovura, watadu gayo  Bangbembatayo. Yugoti naringbisapa Yesu a ni gu boro nga Bangbembatayo fu gu riivura nga ga ruru amaraika. (Yugoti 19:14-16) Na Pauro afura tipa “Gbia Yesu” na ‘gako amaraika.’ (2 ATesaroniko 1:7) Sidu, Ziazia Kekeapai nafura tipa Mikaere na “gako amaraika” na Yesu na “gako amaraika.” (Matayo 13:41; 16:27; 24:31; 1 Petero 3:22) Wa duhe nga Ziazia Kekeapai ayanga wẽ ariivura ngbangbaturũ yo ue nga ga amaraika du Mikaere nga barii kuraha Yesu kingia barii kuraha te, si daada ani dakuti gupai nga, Mikaere nga kina Yesu Kristo.