ƝƐFƆLI FARANKANW
An bɛ se ka “Babilonɛ duguba” dɔn cogo jumɛn na
DAƝƐ dɔw bɛ Jirali kitabu kɔnɔ minnu kɔrɔ man kan ka faamu a kɔrɔ jɛ la. (Jirali 1:1) Misali la, a bɛ kuma muso dɔ kan, n’a sɛbɛnnen bɛ a ten kan ko “Babilonɛ duguba”. A b’a fɔ o muso ma ko a sigilen bɛ “jamakulubaw ni siyaw” kan. (Jirali 17:1, 5, 15) A kɔrɔjɛ la, muso si tɛ se ka o ko kɛ. Babilonɛ duguba, muso yɛrɛ-yɛrɛ tɛ, nka taamasyɛn de don. O la sa, o jatɔmuso bɛ mun taamasyɛn de jira?
Jirali 17:18 bɛ kuma o muso kelen kan i ko duguba, “min bɛ sigi dugukolo kan masakɛw bɛɛ kun na.” “Dugu” daɲɛ bɛ jɛkulu labɛnnen dɔ de kofɔ. Ikomi o “duguba” bɛ ka fanga boli “dugukolo kan masakɛw” bɛɛ kunna, muso min tɔgɔ ye ko Babilonɛ duguba, o ka kan ka kɛ jɛkulu ye min ka fanga bɛ ka nɔ bila diɲɛ yɔrɔ bɛɛ la. A bɛ se ka wele ko fangatigiyabolo min bɛ diɲɛ fan bɛɛ. O ye fangatigiyabolo sugu jumɛn ye? O ye diinɛ fangatigiyabolo ye. An ka Jirali kitabu tɛmɛsira dɔw ta, minnu b’a jira kun min na an bɛ nin kumaw fɔ.
Fangatigiyabolo bɛ se ka kɛ politiki ye walima san-ni-feere ye walima diinɛ ye. Muso min tɔgɔ ko Babilonɛ duguba o tɛ politiki fanga ye, bawo Ala ka Kuma b’a fɔ ko “dugukolo kan masakɛw” walima nin diɲɛ politiki mɔgɔw ye “jatɔya kɛ” a fɛ. Nin jatɔya bɛ bɛnkan de jira, a ye min kɛ ni dugukolo kan masakɛw ye. O b’a jira k’a jɛya kun min na a bɛ wele ko “jatɔmusoba.”—Jirali 17:1, 2; Yakuba 4:4.
Babilonɛ duguba tɛ san-ni-feere fanga ye, bawo a bɛna halaki tuma min na, “dugukolo kan jagokɛlaw,” minnu ye san-ni-feerekɛlaw ye, olu bɛ a su kasi. A jiralen don ko masakɛw ani jagokɛlaw bɛna “jɔ yɔrɔ jan” ka Babilonɛ duguba lajɛ. (Jirali 18:3, 9, 10, 15-17) O la sa, a bɛnnen don k’a fɔ ko Babilonɛ duguba tɛ politiki walima san-ni-feere fangatigiyabolo ye, nka diinɛ fangatigiyabolo don.
Babilonɛ duguba jiralen bɛ i ko diinɛ, o sɛmɛntiyalen don kosɛbɛ nin kuma fɛ, ko a ka “subaaya” ko tun ye siyaw bɛɛ lafili. (Jirali 18:23) Ikomi subaaya sugu bɛɛ ye batoli ye ani u bɛ jinɛw ka fanga de kɔrɔ, a tɛ bali an na ko Bibulu bɛ Babilonɛ duguba wele ko “jinɛw sigi yɔrɔ.” (Jirali 18:2; Dutɛrɔnɔmɛ 18:10-12) Ala ka kuma b’o dugu jira fana i ko dugu min b’a kɔdon diinɛ lakika ma, ka “kiraw ni Ala ka mɔgɔ senumaw” tɔɔrɔ. (Jirali 18:24) Tiɲɛ na, koniyaba sugu dɔ bɛ Babilonɛ duguba la diinɛ lakika fan fɛ fo a bɛ tɔɔrɔba ani fagali yɛrɛ lase “Yesu seerew” ma. (Jirali 17:6) Kuma surun na, muso min tɔgɔ ko Babilonɛ duguba, a jɛlen don k’o ye diinɛ nkalonmaw bɛɛ lajɛlen ka fangatigiyabolo de ye, o bɛ diinɛ bɛɛ lajɛlen fara ɲɔgɔn kan minnu kɔdonnen don Jehova Ala ma.