TIDAN líburu Arufudúni o Apokalipsis, anihein burí dimurei le moun lumuti gunfurandawa lan kei labürüdǘn ñein (Arufudúni 1:1). Aban hénpulu, adimurehatu tuagu aban horu to uáguboun bürüwañu lan aban iri tereberugu “Babilónia to Wéiriboun”. Ariñagatu giñe tañuuruba lan hagibuagu saragu “gürigia [...] luma néchani” (Arufudúni 17:1, 5, 15). Siñati tadügüni aban würi lautu ügürügü luma abun le, ligíati mosu lubéi aban lan sínbolu Babilónia to Wéiriboun. Kati mini lubéi sínbolu le?

Afuranguagüdati Arufudúni 17:18 tuguya lan “óunwenbu uburugu le agumadirubaliña lurúeitegu ubóu”. Dimurei “uburugu” adügati lun wasaminarun hawagun saragu gürigia  óundaragu lidan aban. Ani “óunwenbu uburugu” le, ligía agumadirubaliña “lurúeitegu ubóu”. Ligíati, Babilónia to Wéiriboun menefánti tuguya lan óundaruni to gabafutimaboun ligibuagu sun ubóu. Tuguya aban óundaruni lánina relihión, mama lánina politika ni lánina bísinisi. Ariha waméi ida liña lan lanügüniwa fiú bérusu tídangiñe líburu Arufudúni lidoun saminaü le.

Würi to gíriboun Babilónia to Wéiriboun mama aban óundaruni politiku ladüga ariñagatu Lererun Bungiu: “Aganawaaña urúeigu ha ubouaguna lidan ahoruhani tuma”. Adügatu magíaguni hama dan le tadaagun daradu hama adüga tuguya furumiñeguarügü katei lun gabafu tan hawagu. Ligía lariñawagúnbei tuagu “óunwenbu horu” (Arufudúni 17:1, 2; Santiagu 4:4).

Ariñagatu Bíbülia danme lan tagünrinchawagun würi, hasakürihaba lan o hayahuaba lan “alugurahatiña burí ha ubouagubaña” o sun óundaruni to lánina bísinisi. Ítarati, furanguti luagu mama lan aban óundaruni lánina bísinisi Babilónia to Wéiriboun. Arufudati bérusu burí le luagu dandu lan urúeigu kei alugurahatiña herederuba aríaguoun “disegiñe” (Arufudúni 18:3, 9, 10, 15-17). Garichati lasaminaruniwa luagu mama lan aban óundaruni politiku ni lánina bísinisi Babilónia to Wéiriboun, aban óundaruni lánina relihión.

Anihein amu resun luagu aban tan óundaruni lánina relihión: Chóuruwati luagu eyeedagua tumutiña lan néchanigu lau “tabiñarahan” (Arufudúni 18:23). Sun luwuyerigu abiñarahani hámagiñe máfianu liabin. Ligía maweiridun tubéi wanigi luagu tagúahan Bíbülia tun Babilónia to Wéiribon “hábiñe máfianu” (Arufudúni 18:2; 2 Lúrudu 18:10-12). Ariha wamuti giñe luagu wéiri lan lebedaagun óundaruni le lun relihión inarüniti, éibaaha lumutiña dandu “profetagu” kei “lánigu Bungiu” (Arufudúni 18:24). Wéiriti liyereehan relihión inarüniti tun, darí lun téibaahaniña ha “adimurehabaña luagu Hesukrístu” ani áfaraguataña (Arufudúni 17:6). Chóuruti: Babilónia to Wéiriboun aban sínbolu tani sun relihión to ebedaaguboun lun Heowá Bungiu lidan sun ubóu.