LÓN ewe puken Pwärätä, a mak chómmóng kapas monomon. Ren chék áwewe, a wor pwóróusen emén fefin a mak ewe it “Papilon mi Lapalap” wóón chamwan. Ena fefin a mómmóót wóón mwú me mwichen aramas. (Pwärätä 17:1, 5, 15) Iwe a ffat pwe Papilon mi Lapalap eú chék kapas monomon pún wesewesen emén fefin esap tongeni ina usun. Iwe, ena fin lisowu lón kapas monomon a liosuetá met?

Lón Pwärätä 17:18, pwal ina i chék ewe fefin a wewe ngeni “ewe telinimw mi lapalap a nemenem won ekewe kingen fanüfan.” Ei kapas “telinimw,” a pwal tongeni wewe ngeni eú mwicheichen aramas. Iwe, pokiten ena “telinimw mi lapalap” a nemenem wóón “ekewe kingen fanüfan,” iwe a ffat pwe ena fefin mi iteni Papilon mi Lapalap a wewe ngeni eú mwicheich mi watte an nemenem nge a chéúfetál wóón unusen fénúfan. Met sókkun nemenem ena? Ina eú nemenem lón pekin lamalam. Nengeni mwo ifa usun pwal ekkóch wokisin lón ewe puken Pwärätä ra affata pwúngún ena pwóróus.

A tongeni wor nemenem lón pekin mwú, business are lamalam. Nge ena fefin itan Papilon mi Lapalap esap eú nemenem lón pekin mwú pún Paipel a apasa pwe “ekewe kingen fanüfan” are ekkewe mwúún fénúfan, ra “föri föförün lisowu” ngeni neminna. Neminna a lisowumwáál ngeni ekkewe sounemenemen fénúfan weween an chiechi ngeniir, me féri ese lifilifil met fán iten epwe wor an nemenem me manaman wóór. Ina popun an iteni “ewe fin lisowu mi iteföüla.”​—Pwärätä 17:1, 2; James 4:4.

Papilon mi Lapalap esap eú nemenem lón pekin business pún “ekewe chon amömö won fanüfan” repwe kechiweiti i fansoun an epwe kataló. Ekkewe king me chón amémé repwe nengeni Papilon mi Lapalap seni “me toau.” (Pwärätä 18:3, 9, 10, 15-17) Ina popun, a pwúng ach sipwe  apasa pwe Papilon mi Lapalap esap eú nemenem lón pekin mwú are pekin business nge ina eú nemenem lón pekin lamalam.

Iei pwal popun a ffatoló pwe Papilon mi Lapalap eú nemenem lón pekin lamalam pún a mak pwe a kan ókkótupu ekkewe mwú meinisin ren an “angangen rong.” (Pwärätä 18:23) Pokiten angangen roong meinisin ra popu seni lamalam me ekkewe chónláng mi ngaw, sise máirú atun Paipel a apasa pwe Papilon mi Lapalap “leenien ekkewe chónláng mi ngaw.” (Pwärätä 18:2, NW; Tuteronomi 18:10-12) A pwal mak pwe ena nemenem a ú ngeni ewe lamalam mi enlet ren an eriáfféwú “ekewe soufos me ekewe chon pin.” (Pwärätä 18:24) Pokiten a fókkun watte án Papilon mi Lapalap oput ewe lamalam mi enlet, iwe a fókkun ekkeriáfféwú me nieló “noun Jises kewe chon pwarata.” (Pwärätä 17:6, TF) Ina minne, a ffat pwe ena fefin mi iteni Papilon mi Lapalap a liosuetá ewe mwicheichen lamalam mi chofona wóón unusen fénúfan, kapachelong ekkewe lamalam meinisin mi ú ngeni Jiowa Kot.