BIATHLAM cauk hi a biafang ningin lak awk a ṭha lomi tampi a um. (Biathlam 1:1) Tahchunhnak ah, “A Liannganmi Babilon” timi min a cal ah aa ṭialmi nu kong kha a chim. Mah nu cu “miphun hna le ram hna” cungah a ṭhu tiah a ti. (Biathlam 17:1, 5, 15) Nu pakhat cu cutin a ṭhut khawh taktak lai lo caah Babilon nih aiawhmi a ngei lai. Cu a si ahcun zeidah a aiawh?

Mah nu cu Biathlam 17:18 nih “vawlei cung siangpahrang hna a uktu khualipi” a si tiah a ti. “Khualipi” timi biafang nih mibu bu khat kha a langhter. Mah “khualipi” nih hin “vawlei cung siangpahrang hna” kha a uk dih hna caah cu min a  ngeimi nu cu vawlei cung pumpi ah huham a ngeimi bu pakhat a si lai. Mah kha vawlei empire tiah tlak ngaiin ti khawh a si. Zei bantuk empire dah a si? Biaknak empire a si. Cutin chim awkah Biathlam chung a kong cheukhat he zeitindah aa pehtlaih ti kha zoh u sih.

Empire cu uknak lei zong a si kho, chawlehnak asiloah biaknak lei zong a si kho. Babilon Khualipi timi cu uknak lei empire a si lo, zeicahtiah “vawlei cung siangpahrang hna” asiloah hi vawlei uktu hna cu amah he “sualnak an tuah” tiah Pathian Bia nih a ti. Sualnak an tuah timi cu hi vawlei uktu pawl he ṭanṭinak an tuah ti kha a chim duhmi a si i “hlawhhlangnu mi lianngannu” tiah zeicah auh a sinak kong kha a fianter.—Biathlam 17:1, 2; Jeim 4:4.

A Liannganmi Babilon cu chawlehnak empire zong a si kho lo, zeicahtiah “khuazakip chawlet pawl” cu mah nu a rawh tikah an ṭap an hram lai tiah a ti. A taktak ti ahcun siangpahrang le chawlet pawl nih A Liannganmi Babilon kha “a lang hlatpi” in an conh tiah a ti. (Biathlam 18:3, 9, 10, 15-17) Cucaah Babilon cu uknak lei empire a si lo bantukin, chawlehnak empire zong a si lo caah biaknak lei empire a si tiah ti cu aa tlakmi a si.

“Hlennak mitleh thiamnak [“thlarau thiamnak,” NW] in mi vialte kha a hlen hna timi bia zong nih A Liannganmi Babilon cu biaknak lei a si ti kha a fehter chin. (Biathlam 18:23) Thlarau thiamnak dihlak cu khuachia sinin a ra mi a si caah Baibal nih Babilon kha “khuachia le thlarau thur nih an um hnawh cang” tiah a timi kha khuaruahhar awk a si lo. (Biathlam 18:2; Deuteronomi 18:10-12) Hi empire nih hin biaknak hmaan kha i bia tak ngaiin a ralchan i “profet hna le Pathian mi hna” kha a hrem hna ti zongin a ti. (Biathlam 18:24) A ngaingai ti ahcun A Liannganmi Babilon nih ‘Jesuh cungah zumhawktlak in a ummi hna’ kha puarhrang ngaiin a hrem hna lengah thah tiangin a hmaanmi biaknak kha a huat. (Biathlam 17:6) Cucaah A Liannganmi Babilon timi mah nu nih vawlei cung a hmaan lomi biaknak vialte kha a aiawh ti a fiang, cu ah Jehovah a ralchanmi biaknak vialte aa tel.