DAN liv Revelasyon i annan bann lekspresyon ki senbolik. (Revelasyon 1:1) Par egzanp, i mansyonn en fanm ki lo son fron i’n ekrir non “Gran Babilonn.” Sa fanm i ganny dekrir pe asiz lo “bann lafoul dimoun” ek “bann nasyon.” (Revelasyon 17:1, 5, 15) Vi ki napa okenn fanm ki kapab fer en keksoz koumsa, alors Gran Babilonn i bezwen senbolik. Ki sa prostitye senbolik i reprezante?

Dan Revelasyon 17:18, sa menm fanm senbolik i ganny dekrir konman “sa gran lavil ki domin lo tou lerwa later.” Sa mo “lavil” i endik en group dimoun organize. Vi ki sa “gran lavil” i annan kontrol lo bann  “lerwa later,” sa fanm ki apel Gran Babilonn i bezwen en lorganizasyon ki annan en gran lenfliyans partou dan lemonn. Nou kapab dir ki i en pouvwar mondyal. Ki kalite pouvwar? En pouvwar politik, komersyal, oubyen relizye? I en pouvwar relizye. Annou vwar konman serten pasaz dan liv Revelasyon i fer nou tonm lo sa konklizyon.

Sa fanm ki apel Gran Babilonn pa en pouvwar politik akoz Parol Bondye i dir ki bann “lerwa later,” setadir politik sa lemonn, “in livre zot dan limoralite avek li.” Son limoralite pe refer avek bann lalyans ki i’n fer avek bann dirizan sa later e i eksplike akoz i ganny apele “gran prostitye.”—Revelasyon 17:1, 2; Zak 4:4.

Gran Babilonn pa kapab en pouvwar komersyal akoz “bann marsan lo later” ki reprezant komers, pou lamante kan i pou ganny detrir. Anfet, bann lerwa ek marsan, zot tou le de zot ganny dekrir pe “debout lwen” pe get Gran Babilonn. (Revelasyon 18:3, 9, 10, 15-17) Alor i fer sans pour konklir ki Gran Babilonn pa en pouvwar politik, ni en pouvwar komersyal, me i en pouvwar relizye.

Lefe ki Labib i dir Gran Babilonn i tronp bann nasyon par son bann “pratik mazik” i en lot laprev ki i en pouvwar relizye. (Revelasyon 18:23) Bann demon ki par deryer bann pratik mazik. Alor i pa sirprenan ki Labib i apel Gran Babilonn “en landrwa kot bann demon i reste.” (Revelasyon 18:2; Deterononm 18:10-12) Gran Babilonn i osi ganny dekrir pe opoz vre larelizyon severman e pe persekit “bann profet” ek “bann sen.” (Revelasyon 18:24) I annan en sitan gran laenn pour sa vre larelizyon ki i persekit bann temwen Zezi e menm touy zot. (Revelasyon 17:6) Alors, i kler ki sa fanm ki apel Gran Babilonn i reprezant pouvwar mondyal bann fo larelizyon. Sa i enkli tou larelizyon ki opoz Zeova, sa vre Bondye.