APOCALIPSISGI ibmar soggwengi sunmaglenaile inbaggwa aa ibmar sunnadgi sunmaglenasurdaed ibmar baid obarnadaed (Apocalipsis 1:1). Soggwen anmar sogoena, Apocalipsisgi sunmagnaid ome gamba saed e bebegi narmaggar naye “Babilonia Neggwebur Nue Nug Niggad”. Anba sognabalid, we ome “dulemar buggidarad geb dulemar gaya aggar aggar sunmagmalad” birgine siiye (Apocalipsis 17:1, 5, 15). Ome sunnad geg deyob ibmar imagsoggu Babilonia neggwebur nue nug niggadye soglenaidi ibmar baid obarnair gebed. ¿Ibu obarnasunna?

Apocalipsis 17:18 gine sognaid, we ome, “we neggwebur, we nabneggi reymar birgi neg dagmaid[ye]”. “Neggwebur[ye]” soglenasoggu iddolledo dulemar igar nigga bugmalad obare. Deginbali “we neggwebur, we nabneggi reymar birgi neg dagma[balid]”. Degsoggu ome Babilonia neggwebur nue nug niggadye bilegedi, bela neg dirbimaggar neg gasa sii iddollesundo. ¿We ibu ibmar obarsunna? Bela Bab igargi sunmagmalad  neg dirbimaggar bugmalad obared. Apocalipsisgi sognaid ibigala anmar deyob soge.

Políticomala nabir dummaganga buggued, mani ibgana dummaganga nabir gumarmogad, geb Bab igargi sunmagmaladi anba nabir emar idugedga gumarmogad. Auggi we ome Babilonia nue nug niggadye bilegedi, políticomar dummagan neg dagmamaid obarsulid, ¿ibigala? Ar Bibliagi soglenaid ‘reymar nabneggi bugmaladi [dummagan neg idumamaidi] wemala galagwensur we omebogwa neg sidsigi gudidiye’. We ome galagwensur gudiiye soglegedi, obared ome políticomar dummaganbo aggasdaedi. Degsoggu mag iddolleged ibigala Bibliagi soglenai “ome gamba nudsu[ye]” (Apocalipsis 17:1, 2; Santiago 4:4).

Bibliagi soglenabalid, we ome obeloledele “dule[mar] we nabneggi ibmar uggedgi arbadimaladi” ise boarmaloye. Degsoggu dagledo Babilonia neggwebur nue nug niggad soglenaidi ibmar uggedgi arbamalad buggwad obarnasuli. Ar Bibliagi sognaid, reymala, geb ibmar uggedgi arbamaladi “bannaba” daggwissi gumaloye we ome oiddolleder (Apocalipsis 18:3, 9, 10, 15-17). Degsoggu mag dagleged Babilonia neggwebur nue nug niggadye soglenaidi dummagan neg dagmamaid obarnasulid, geb ibmar uggedgi arbabugmalad obarsurbalid, Bab igargi sunmagmaladgi sunmagnaid.

¿Ibigala soglege we Bab igargi sunmagmalad obarnaye? Ar soglenaid we ome bela dulemar yardaggega nergan ibmar ebuye geb brujería ibmar ebubarye (Apocalipsis 18:23). Bela we ibmarmar Niagine daniggid. Aaga geg anmar iddosulid Bibliagi soglenagua Babilonia neggwebur nue nug niggadi “niamar e neg[ye]” (Apocalipsis 18:2; Deuteronomio 18:10-12). Deginbali soglenabalid, we Bab igar sunsoged e isdarad obarye ar “Bab Dummad gaya burba barsogmalad” geb ‘Jesucristo sordagan’ balegindaed (Apocalipsis 18:24). Bela belad Bab igar sunsoged sae daggedbali ‘Jesúsgi sunmagmalad’ baleginned sabsur saega oburgwedse (Apocalipsis 17:6). Degsoggu Babilonia neggwebur nue nug niggadi bela noar Bab igar odurdagdimalad obared, bela Jehovági sunmagmalad e isdarmalad.