EJE e hnine la tusi Hna Amamane la itre trenge ewekë hna thatreine kö troa trotrohnin, pine laka, itre hatren ne ewekë lai hna amamane koi Ioane. (Hna Amamane 1:1, MN ) Hanawange la ketre ceitun, kola qaja la ketre föe hna hën, ka hape, “Babulona Atraqat,” ëje lai hna cinyihan hune la göpadri nyiidro. Hna qaja göne la föe celë, laka, kola të hune la “ite ka ala nyimu, me ite nöj.” (Hna Amamane 17:​1, 5, 15) Pine laka, pëkö föe e celë fen ka ijije troa kuca tune lai, haawe, easë a trotrohnine ka hape, hetre ewekë hna nyihatren hnene la Babulona Atraqatr. Matre nemene la hna nyihatren hnene la föe ne gojeny, ene Babulona Atraqatr?

Ame ngöne Hna Amamane 17:​18, hna qaja mina fe lai pengöne föe cili, a hna aceitunën memine la “lapa atraqate lo ate musinëne  la ite joxu ne la fen.” Ame la hnëewekë hna hape “lapa,” tre, kola amamane la ithikeu ne la itre atr troa caas maine troa caalapa. Pine laka, ka musi la “lapa atraqat” cili hune la “ite joxu ne la fen,” haawe, ame lai föe hna hën ka hape Babulona Atraqat, tre, troa ketre organizasio ka hetre menen, nge ka lapane asë la fene hnengödrai. Hna hëne hnyawa la organizasio cili ka hape, ketre musi ka tru e cailo fen. Nemene pengöne musi ka tru? Kola qaja la musi ne la hmi. Drei la itre hna cinyihan hnine la tusi Hna Amamane, itre mekun ka aijijë së troa anyipicine lai.

Ijije hi troa mus hnei politik, me musi itre ka itö me salem, maine jëne la hmi pena. Ame la föe hna hën ka hape Babulona Atraqatr, tre, thaa musi politike kö, pine laka, kola qaja hnene la Wesi Ula i Akötresie ka hape, “ite joxu ne la fen,” maine itre ka kuci politik ne la fene celë a “kuci ngazo” me nyiidro. Ame lai kuci ngazo cili, tre, kola qaja lo itre isisinyikeu hna kuca hnei nyiidro memine la itre ka musi e celë fen, nge celë hi kepine matre kola hë nyiidro ka hape, “föe ne gojenyi ka sisitia.”​—Hna Amamane 17:​1, 2; Iakobo 4:4.

Ame Babulona Atraqatr, tre, thaa celë kö la musi itre ka itö me salem, pine laka, ame lo “angete itö e celë fen,” ke, angatr a troa treije pi nyiidro ngöne la ijine kola troa apaatrenyi nyiidro. Eje hi lai laka, hna qejepengöne la itre joxu memine la angetre itö me salem, angatr a goeë Babulona Atraqatr me cile “ananyi” nyiidro. (Hna Amamane 18:​3, 9, 10, 15-​17) Qa ngöne lai, meköti hi tro sa qaja ka hape, ame Babulona Atraqatr, tre, thaa musi politike kö maine musi itre ka itö me saleme pena, ngo celë pe ketre musi ne la hmi.

Kola mama hnyawa la pengö i Babulona Atraqatr, laka kola qaja la hmi, ke, hnei nyiidro hna amenun la nöje asë hnene la “nyinyithina” i nyiidro. (Hna Amamane 18:23) Pine laka, ame asë hi la itre aqane kuci haze ngöne hmi, tre qaathen la itre dremoni, thaa sesëkötre kö së la kola hën hnei Tusi Hmitrötr lae Babulona Atraqatr ka hape, “hnalapa ne la nöjei demoni.” (Hna Amamane 18:2; Deuteronomi 18:​10-​12) Hna qejepengöne mina fe, ka hape, kola catre icilekeu hnene la musi cili kowe la nyipi hmi, nge eje a qanangazon la “nöjei perofeta” me “ange ka hmitöt.” (Hna Amamane 18:24) Eje hi laka, tru catre la hnei Babulona Atraqatr hna methinën la nyipi hmi matre ngazo catr la aqane icilekeu i nyiidro, a goi humuthe fe “la itete anyipici Iesu.” (Hna Amamane 17:6) Haawe, kola mama hnyawa laka, ame la föe celë hna hëne ka hape Babulona Atraqatr, tre, eje a nyihatren hnyawa la musi ne la hmi ka thoi e cailo fene hnengödrai, a kola qaja fe la itre hmi asë ka icilekeu me Iehova Akötresie.