N̄WED Ediyarade ọdọn̄ọ mme ndamban̄a ikọ. (Ediyarade 1:1) Ke uwụtn̄kpọ, enye asiak n̄wan oro ẹwetde enyịn̄ emi “Akwa Babylon” ke ọkpọiso esie. Ẹdọhọ ke n̄wan emi etie ke enyọn̄ “otuowo ye mme idụt.” (Ediyarade 17:1, 5, 15) Sia ata ata n̄wan ndomokiet mîkpekemeke ndinam emi, ana Akwa Babylon edi ndamban̄a n̄wan. Ntre, anie edi ndamban̄a akpara emi?

Kpa ndamban̄a n̄wan emi ke ẹtịn̄ ẹban̄a, ke Ediyarade 17:18, nte “akwa obio oro enyenede obio ubọn̄ emi akarade ndidem isọn̄.” Ikọ oro “obio” owụt otu owo oro ẹtịmde. Sia  edide “akwa obio” emi akara “ndidem isọn̄,” ana n̄wan oro ẹkotde Akwa Babylon mi edi esop emi odudu esie esịmde ofụri ererimbot. Nte enende, ẹkeme ndikot enye ukara ofụri ererimbot. Nso orụk ukara? Eke ido ukpono. Tịm fiọk nte ndusụk ufan̄ikọ emi ẹnyenede ebuana ye n̄wed Ediyarade ẹnamde nnyịn isịm ubiere emi.

Ukara ekeme ndidi eke ukaraidem, eke unyamurua, m̀mê eke ido ukpono. N̄wan emi ẹkotde Akwa Babylon mi idịghe obio ukaraidem koro Ikọ Abasi ọdọhọ ete ke “ndidem isọn̄,” m̀mê mme ikpehe ukaraidem eke ererimbot emi, ‘ẹma ẹnam use’ ye enye. Use esie aban̄a nte enye akadiande idem ye mme andikara isọn̄ emi onyụn̄ anam an̄wan̄a ntak emi ẹkotde enye “akwa akpara.”—Ediyarade 17:1, 2; James 4:4.

Akwa Babylon ikemeke ndidi ukara unyamurua koro “mbonurua isọn̄,” emi ẹdade ẹban̄a mme ikpehe unyamurua, ẹyefụhọ ẹban̄a enye ke ini ẹsobode enye. Ke akpanikọ, ẹdọhọ ke ndidem ye mbonurua ‘ẹda nsannsan’ ẹse Akwa Babylon. (Ediyarade 18:3, 9, 10, 15-17) Mmọdo, owụt ifiọk ndibiere nte ke Akwa Babylon idịghe ukara ukaraidem m̀mê eke unyamurua, edi edi eke ido ukpono.

Ikọ oro nte ke Akwa Babylon ada “edinam ubụpekpo” esie otụn ofụri ererimbot usụn̄ afiak ọsọn̄ọ nte ke enye enyene n̄kpọ ndinam ye ido ukpono. (Ediyarade 18:23) Sia kpukpru orụk ubụpekpo ẹtode mme demon, ikpaha owo idem nte Bible okotde Akwa Babylon, “ebietidụn̄ mme demon.” (Ediyarade 18:2; Deuteronomy 18:10-12) Ẹdọhọ n̄ko nte ke obio ukara emi ọbiọn̄ọ ido ukpono akpanikọ ọkpọsọn̄ ọkpọsọn̄ onyụn̄ ọkọbọ “mme prọfet” ye “ndisana owo.” (Ediyarade 18:24) Ke akpanikọ, Akwa Babylon enen̄ede asua ido ukpono akpanikọ esịm udomo oro ọkọbọde enye idiọk idiọk onyụn̄ owotde “mme ntiense Jesus.” (Ediyarade 17:6) Ntem, odot ndinyịme nte ke n̄wan emi ẹkotde Akwa Babylon ada aban̄a ukara ererimbot eke nsunsu ido ukpono, emi esịnede kpukpru ido ukpono emi ẹbiọn̄ọde Jehovah Abasi.