A BATI kibuntaeka n te boki ae Te Kaotioti aika taian taetae ni kaikonaki. (Te Kaotioti 1:1) N te katoto, e taekinaki iai te aine ae arana “Baburon ae Kakannato” ae koreaki arana i aon ramwana. E taekinaki bwa e tekateka te aine aei i aoia “aomata aika uanao ao natannaomata.” (Te Kaotioti 17:1, 5, 15) Kioina ngkai akea raoi te aine ae kona ni karaoa aei, nanona ngkanne bwa Baburon ae Kakannato bon te kabotau. Mangaia are tera ae e kaikonakaki iroun te aine ae te kabekaau aei?

N Te Kaotioti 17:18, e kabwarabwaraaki naba te aine aei bwa “te kaawa ae kakannato ae tautaeka i aoia uean te aonnaba.” E kateretereaki taekaia te koraki n aomata aika baireaki, n te taeka ae “te kaawa.” Kioina ngkai boni ngaia “te kaawa ae kakannato” are e taua taekaia “uean aonnaba,” nanona ngkanne  bwa te aine ae arana Baburon ae Kakannato aei, bon te botaki ae katobibia te aonnaba ae kaainaki irouia aomata. E kona naba n aranaki bwa te botaki ae kabutaa te aonnaba. Te aeka ni botaki raa ngkanne? Bon te botaki n Aro. Ti na nori rongorongo tabeua n te boki ae Te Kaotioti ake a na kairira nakon te koaua aei.

Rabwata aika a kona n riki bwa botaki, bon te tautaeka, te bitineti ke te Aro. Te aine are arana Baburon ae Kakannato bon tiaki te botaki n tautaeka ibukina bwa e taekinaki n Ana Taeka te Atua bwa “uean aonnaba” aika taan tautaeka n te aonnaba aei, a “wewene ni bure” ma ngaia. E nanonaki n ana wene ni bure bwa e itabon ma taan tautaeka n te aonnaba, ao e a kabwarabwaraaki naba iai bukin aranakina bwa “te kabekaau are kakannato.”—Te Kaotioti 17:1, 2; Iakobo 4:4.

Tiaki naba te botaki ni bitineti Baburon ae Kakannato, ibukina bwa “taan iokinibwai n te aonnaba,” ake taani bitineti n te aonnaba, a tanginiweneia n ana tai ni kamaunaaki. Ni koauana, e taekinaki bwa uean aonnaba ao taan iokinibwai a uaia n taraa Baburon ae Kakannato mai “kiraroa.” (Te Kaotioti 18:3, 9, 10, 15-17) Mangaia are e bon riai ngkanne n iangoaki bwa Baburon ae Kakannato bon tiaki te botaki n tautaeka, ke te botaki ni bitineti, ma bon te botaki n Aro.

E a kakoauaaki riki kinaakini Baburon ae Kakannato n te rongorongo are e mwamwanaia te botannaomata ni kabane n ana “tabunea.” (Te Kaotioti 18:23) Kioina ngkai tabunea nako bon aia waaki taimonio, e aki kamimi ngkanne ngkai e aranaki Baburon ae Kakannato n te Baibara bwa “aia tabo ni maeka taimonio.” (Te Kaotioti 18:2; Te Tua-Kaua 18:10-12) E kabwarabwaraaki naba te botaki aei bwa e rangi ni karitei nakon te Aro ae koaua, ni bwainikirinia “burabeti” ao “te koraki aika itiaki.” (Te Kaotioti 18:24) Ni koauana, e rangi ni korakora ribaakin te Aro ae koaua irouni Baburon ae Kakannato, n te aro are e a bwainikirinia kaaina n te aro n iowawa ao n tiringia “ana tia kakoaua Iesu.” (Te Kaotioti 17:6) Mai ikai are e a teretere iai bwa te aine ae arana Baburon ae Kakannato, bon te botaki n Aro ae kewe ae katobibia te aonnaba, ake a bane ni kaainna, Aaro nako ake a kaitaraa Iehova ae te Atua.