PROKASOVNNI hea pustokant boroiloleo zaiteo vostu khunnachea rupan boroileat ani taka lagon teo somzonk kotthin zatat. (Prokasovnni 1:1) Thoim eke baile vixim sanglam. Tichea koplar, “podvedar Babilonia” mhunn nanv boroilolem asa. Ani ti ‘urponji ani raxttrancher’ bosloli asa mhunn dakhoilam. (Prokasovnni 17:1, 5, 15) Hem podvedar Babilonia vo Vorixtt Babilon ek khori bail zaunk xokona karonn ek bail sobar lokancher ani raxttrancher bosonk xokona. Toxem zalear, Vorixtt Babilon mhunnttlear kitem?

 Vorixtt Babilon mhunnttlear, “sonvsarachea patxiancher razvottki choloita tem vorixtt xar” oxem Prokasovnni 17:18 amkam sangta. “Xar” hea utracho orth, manddavoll aslolem lokanchem songotton. Hem xar “sonvsarachea patxiancher razvottki choloita” mhunnttoch, tem sonvsarantlea raz-odhikareancher probhav ghalta toslem ek ontoraxttria songotton astolem. Tor hem koslem songotton zait? Tem ek dhormik songotton zaun asa. Oxem mhunnonk kitem karonn asa tem ami atam polloum-ia.

Songottonam veg-vegllea torechim asonk xokta, udharonnak razkarbhareanchem, veapar-dhondeachem vo dhormik. Vorixtt Babilon, razkarbhareanchem songotton aschem na karonn prithumer aslolea “sogllea razamnim” mhunnche razkarbhareamnim tiche lagim “kamchar kela” mhunn Bible sangta. Sonvsarachea razkarbhaream sangata natem zoddun tinnem kamchar kela ani tancher aplo odhikar cholounk tinnem sogleo vatto apnnaileat. Taka lagon tika “nanv vosti xindoll-bail” mhunnttlea.—Prokasovnni 17:1, 2; Jakob 4:4.

Vorixtt Babilon veapar dhondeachem songotton zaunk xokona karonn “sonvsarantle veapari” ticho bhosm zatana roddttole mhunn Bible sangta. Sonvsarantle raza ani veapari “pois-pois ravun” vorixtt Babilonak polloitole mhunn boroilolem asa. (Prokasovnni 18:3, 9, 10, 15-17) Taka lagon, vorixtt Babilon razkarbhareanchem vo veapar-dhondeachem songotton nhoi punn ek dhormik songotton mhunn amchean mhunnonk zata.

Vorixtt Babilon ek dhormik songotton mhunn sangonk anik ek karonn asa. Tem “ghaddiponna” udexim soglea raxttrank fosoita mhunn Bible dakhoita. (Prokasovnni 18:23) Soglea torechem ghaddiponn, dhormank mellon asa, ani tachea fattlean devcharancho hat asa. Taka lagon, vorixtt Babilonant devchar firtat oxem Bible mhunntta. (Prokasovnni 18:2; Dusri Somurt 18:10-12) Hem songotton Devachi khori bhokti kortoleam add vochon, ‘provadeank’ ani Devachea ‘bhoktank’ tras dita  mhunn Bible sangta. (Prokasovnni 18:24) Vorixtt Babilon, khoro dhorm pallttat tancho itlo dves korta ki tinnem ‘Jezuchea Sakxidarank’ khub dhumalle dileat. Tinnem thoddeancho jiv porian kaddla. (Prokasovnni 17:6) He sogle purave topasun polloilear, vorixtt Babilon mhunnttlear ek dhormik songotton mhunn amkam kollon ieta. Jehova Devachea add aslole sonvsarantle sogle khotte dhorm tantunt mellon asat.