ANG libro sang Bugna may mga termino nga indi dapat hangpon nga literal. (Bugna 1:1) Halimbawa, ginsambit sini ang isa ka babayi nga may ngalan nga “Babilonia nga Daku” nga nasulat sa iya agtang. Ini nga babayi nagapungko sa ‘mga kadam-an kag mga pungsod.’ (Bugna 17:1, 5, 15) Wala sing literal nga babayi nga makahimo sini, gani sigurado nga simbuliko ang Babilonia nga Daku. Ano ang ginarepresentar sining simbuliko nga makihilawason nga babayi?

Sa Bugna 17:18, ini nga babayi ginalaragway bilang “daku nga siudad nga may ginharian sa mga hari sang duta.” Ang termino nga “siudad” nagakahulugan sang isa ka organisado nga grupo sang mga tawo. Ining “daku nga siudad” nagakontrol sa “mga hari sang duta,” gani ginapakita sini nga ang babayi nga ginatawag Babilonia nga Daku isa ka impluwensiado kag internasyonal nga organisasyon. Masiling nga isa ini ka emperyo nga bilog nga kalibutan ang sakop. Ano ini nga emperyo? Isa ka relihioso nga emperyo. Talupangda kon paano ini ginapamatud-an sang pila ka bersikulo sa libro sang Bugna.

Ang isa ka emperyo mahimo nga pulitikal, komersial, ukon relihioso. Ang babayi nga gintawag Babilonia nga Daku indi isa ka pulitikal nga emperyo kay ang Pulong sang Dios nagasiling nga ang “mga hari sang duta,” ukon ang pulitikal nga mga elemento sini nga kalibutan, “nagahimo sang seksuwal nga imoralidad” upod sa iya. Ginahimo niya ini nga imoralidad paagi sa pagpakig-alyansa sa mga manuggahom sini nga kalibutan kag ginahimo niya ang tanan nga paagi para makakuha sing gahom kag para maimpluwensiahan niya sila. Gani  gintawag sia nga “dakung makihilawason nga babayi.”—Bugna 17:1, 2; Santiago 4:4.

Ang Babilonia nga Daku indi man isa ka komersial nga emperyo kay “ang mga negosyante sa duta,” nga nagarepresentar sa komersial nga mga elemento, magalalaw sa iya sa tion nga malaglag sia. Kag mabasa pa gani nga ang mga hari kag mga negosyante nagatan-aw sa Babilonia nga Daku halin “sa malayo.” (Bugna 18:3, 9, 10, 15-17) Gani masiling gid nga ang Babilonia nga Daku indi isa ka pulitikal ukon komersial nga emperyo, kundi relihioso.

Ang dugang pa nga ebidensia nga ang Babilonia nga Daku isa ka relihioso nga emperyo amo ang ginsiling sang Biblia nga ginapatalang niya ang tanan nga pungsod paagi sa iya “espiritistiko nga mga buhat.” (Bugna 18:23) Ang tanan nga klase sang espiritismo relihioso kag naghalin sa mga demonyo, gani indi kita matingala nga gintawag sang Biblia ang Babilonia nga Daku nga ‘ilistaran sang mga demonyo.’ (Bugna 18:2; Deuteronomio 18:10-12) Ini nga emperyo ginlaragway man nga aktibo nga nagapamatok sa matuod nga relihion, kag nagahingabot sa “mga manalagna” kag “mga balaan.” (Bugna 18:24) Daku gid ang kaakig sang Babilonia nga Daku sa matuod nga relihion amo nga mapintas niya nga ginhingabot kag ginpatay pa gani ang “mga saksi ni Jesus.” (Bugna 17:6) Gani, ini nga babayi nga gintawag Babilonia nga Daku maathag nga nagarepresentar sa bilog kalibutan nga emperyo sang butig nga relihion, kag nalakip sa sini ang tanan nga relihion nga nagapamatok kay Jehova nga Dios.