EMBO rOmavandururiro ri nomambo omengi nge ri movisanekero. (Omavandururiro 1:1) Okutara kotjihorera, embo ndi ri hungira ohunga nomukazendu ngwa tjangerwe ena ndi “Babilon otjinene” motjipara tje. Omukazendu ngwi ku za wa haama ‘koviwaṋa nomihoko.’ (Omavandururiro 17:1, 5, 15) Mena rokutja kape nomukazendu womundu ngu ma yenene okuhaama koviwaṋa avihe, oukahu kutja Babilon otjinene otjisanekero uriri. Nu omukazendu omukorondu ngwi u kuramena po tjike?

MOmavandururiro 17:18, omukazendu ngo rukwao ma raisiwa otja “otjihuro otjinene tji tji nouvara wokuhonaparera ozombara ozengi.” Embo ndi “otjihuro” mari hee otjimbumba tjovandu tji tje rikuta kumwe. Mena rokutja “otjihuro otjinene” hi  tji nouvara kombanda ‘yozombara ozengi,’ okutja omukazendu wena Babilon otjinene ma sokurira otjira otjinamasa tjomouye auhe. Otjo matji yenene okuisanewa ouhonapare wouye. Nungwari owo ouhonapare waye? Ouhonapare wozongamburiro. Ngatu tare kutja omazeva tjiva wembo rOmavandururiro maye tu eta vi kepu ndi.

Ouhonapare pe ya au rire owopolitika poo wovarandise poo wozongamburiro. Omukazendu ngwi Babilon otjinene, kauhona wopolotika orondu Embo raMukuru mari tja “ozombara zouye” poo ovimbumba vyopolotika vyouye mbwi, vya “tjitire oruvakiro” kuna ye. Oruvakiro ndwi maru hee omerikutiropamwe eye nga tjita ku novahonapare vouye mbwi nu ihi matji raisa oukahu kutja ongwaye omukazendu ngwi tje isanewa “omukorondu ngwa ingana.”—Omavandururiro 17:1, 2; Jakobus 4:4.

Babilon otjinene kamaatji sokurira ouhonapare womarandisiro mouye, orondu ‘ovarandise vouye’ owo mbu mave kuramenepo orupa romarandisiro, mave ririre otjihuro nokutjiṱira oruhoze indu tji matji yandekwa. Nu wina ozombara novarandise maku zu maze tarere Babilon otjinene okuza “kokure.” (Omavandururiro 18:3, 9, 10, 15-17) Okutja, ihi matji hee kutja Babilon otjinene kauhonapare wopolitika poo wovarandise, nungwari owo ouhonapare wozongamburiro.

Pe nomambo warwe ngu maye ṋunisa komurungu kutja Babilon otjinene ouhonapare wozongamburiro. Owo omambo nga ngu maye tja omukazendu ngwi u pukisa oviwaṋa avihe “noundjai” we. (Omavandururiro 18:23) Mena rokutja omiano avihe vyoundjai vi za mozongamburiro zoposyo nozondemone, okutja katjihimise kutja Ombeibela i tja Babilon otjinene ‘omaṱarero wozombepo ozohakohoke.’ (Omavandururiro 18:2; Deuteronomium 18:10-12) Ouhonapare mbwi wina mau handjuṋunwa kutja u pirukira ongamburiro youatjiri, mokutatumisa ‘ovaprofete notjiwaṋa tjaNdjambi.’ (Omavandururiro 18:24) Mouatjiri, Babilon otjinene tja tonda ongamburiro youatjiri nomasa ngandu ndi tji tji ve tatumisa noutwe nokuzepa imba ‘mbe hongonona Jesus.’ (Omavandururiro 17:6) Okutja omukazendu ngwi wena Babilon otjinene, oukahu kutja eye u kuramena po ouhonapare wozongamburiro zoposyo mouye, nu u kamburira mo ozongamburiro azehe nḓe pirukira Jehova Mukuru.