TAKTABT n Uweḥḥi tessexdam imeslayen yellan d lemtul kan. Theddeṛ-​ed, di lemtel, ɣef yiwet n tmeṭṭut isem-​is “Babil tameqwrant”; isem-​agi yura ɣef wenyir-​is. Teqqar-​ed belli  tameṭṭut-​agi teqqim ɣef ‘lɣaci akk-​d leǧnas.’ (Aweḥḥi 17:1, 5, 15) Imi ulac tameṭṭut i gzemren aţ-​ţexdem ayagi, nefhem-​ed belli Babil Tameqrant mačči ţ-​ţameṭṭut n ṣṣeḥ. D acu i d-​teţmettil ihi tmeṭṭut-​agi?

Aweḥḥi 17:18 yessefham-​ed belli tameṭṭut-​agi “ţ-​ţamdint nni tameqwrant i gḥekmen igelliden n ddunit.” Awal-​agi “tamdint” icudd ɣer tuddsa, yeɛni ɣer terbaɛt n yemdanen yeddukklen ɣef yiwen n leqsed. Imi tamdint-​agi tameqrant teḥkem ɣef “igelliden n ddunit”, tameṭṭut-​nni iţţusemman Babil Tameqrant ţ-​ţuddsa iǧehden, i d-​ikkan akk timura n ddunit. Tuddsa-​yagi teɛna ddin, mačči tasertit (lbulitik) neɣ ttjaṛa. Wali kra n yefyar si tektabt n Uweḥḥi i ɣ-​yeǧǧan a d-​nefhem ayagi.

Tameṭṭut-​nni iţţusemman Babil Tameqrant ur teɛni ara tasertit, axaṭer Awal n Ṛebbi yeqqar-​ed belli “igelliden n ddunit”, yeɛni wid meṛṛa ixeddmen tasertit, “znan” yid-​es. Am wakken tezna neţţat d lḥekkam n ddunit-​agi axaṭer texdem leɛqud yid-​sen yerna texdem ayen akk ilezmen akken aţ-​ţesseǧhed iman-​is w’aţ-​ţesɛu lateṛ fell-​asen. Ɣef wayagi i s-​iţţunefk yisem n “tmenɛult tameqqrant.”—Aweḥḥi 17:1, 2 (Awal n tudert, 2001); Yeɛqub 4:4.

Babil Tameqrant ur teɛni ara ttjaṛa, axaṭer “tteǧǧaṛ n ddunit” ad ḥeznen m’ara teţwikkes. Ama d igelliden ama d tteǧǧaṛ a ţ-​id-​ţmuqulen si “mebɛid.” (Aweḥḥi 18:3, 9, 10, 15-17) Nezmer ihi a d-​nini belli ur teɛni la tasertit la ttjaṛa, meɛna teɛna ddin.

Iban daɣen belli Babil Tameqrant teɛna ddin, axaṭer yura deg Wedlis Iqedsen belli leǧnas akken ma llan ḍaɛen “s ssḥur-[is].” (Aweḥḥi 18:23) Imi yal d ṣṣenf n ssḥur icudd ɣer ddin yerna yekka-​d sɣur leǧnun, Adlis Iqedsen isemma i Babil Tameqrant ‘tanezduɣt n leǧnun.’ (Aweḥḥi 18:2; Asmekti 18:10-12) Awal n Ṛebbi issefham-​ed daɣen belli tuddsa-​yagi teţxaṣam s lqewwa ddin n ṣṣeḥ s uqehher i teţqehhir “lanbeyya akw-​d yemqeddsen.” (Aweḥḥi 18:24) Babil Tameqrant tekṛeh mliḥ ddin n ṣṣeḥ; ɣef wayagi i teţqehhir nezzeh yerna i tneqq ‘inagan n Ɛisa.’ (Aweḥḥi 17:6) Iban-​ed ihi belli tameṭṭut-​nni iţţusemman Babil Tameqrant teţmettil-​ed ddyanat n lekdeb s lǧemla i geţxaṣamen Yahwa Ṛebbi.