IBUKU rĩa Kũguũrĩrio nĩ rĩkoragwo na ũhoro mũingĩ ũheanĩtwo na ngerekano. Kwa ngerekano-rĩ, nĩrĩgwetete mũtumia wĩ na rĩĩtwa “Babuloni ũrĩa Mũnene” rĩandĩkĩtwo thiithi-inĩ wake. Mũtumia ũcio eragwo atĩ aikarĩire “irĩndĩ na ndũrĩrĩ.” (Kũguũrĩrio 17:1, 5, 15) Nĩũndũ gũtirĩ mũtumia wa biũ ũngĩhota gwĩka  ũguo-rĩ, Babuloni ũrĩa Mũnene no mũhaka akorũo e wa ngerekano. Kwoguo mũmaraya ũcio arũgamĩrĩire kĩĩ?

Thĩinĩ wa Kũguũrĩrio 17:18, mũtumia ũcio wa ngerekano erĩtwo “nĩwe itũũra rĩrĩa inene rĩtũire rĩthamakagĩra athamaki a thĩ.” Kiugo “itũũra” kĩonanagia we nĩ ithondeka. Tondũ ‘itũũra rĩu inene’ rĩthamakagĩra “athamaki a thĩ,” no nginya mũtumia ũcio wĩtagwo Babuloni ũrĩa Mũnene akorũo nĩ ithondeka rĩ na ũgucĩrĩria ũtheremete thĩ yothe. Nĩrĩagĩrĩirũo gwĩtwo ũthamaki wa thĩ yothe. Nĩ ũthamaki wa mũthemba ũrĩkũ? Nĩ ũthamaki wa kĩndini. Ta rora wone ũrĩa maandĩko mangĩ marĩa makonainie na ũndũ ũcio thĩinĩ wa ibuku rĩa Kũguũrĩrio matũmaga tuuge ũguo.

Ũthamaki no ũkorũo ũrĩ wa gĩũteti, kĩbiacara, kana kĩndini. Mũtumia ũcio wĩtagwo Babuloni ũrĩa Mũnene ti ũthamaki wa gĩũteti tondũ Kiugo kĩa Ngai kiugaga atĩ “athamaki a thĩ,” kana atongoria a gĩũteti a thĩ ĩno, “marahũraga maraya” nake. Ũmaraya ũcio wake ũronania ngwatanĩro ĩrĩa athondekete hamwe na atongoria a thĩ ĩno, na nĩkĩo etagwo “mũmaraya ũrĩa mũnene.”—Kũguũrĩrio 17:1, 2; Jakubu 4:4.

Babuloni ũrĩa Mũnene ndangĩkorũo arĩ ũthamaki wa kĩbiacara tondũ “ahũri-biacara a thĩ,” magaakorũo magĩcakaya rĩrĩa akaanangwo. Athamaki na ahũri-biacara monanagio makĩĩrorera Babuloni ũrĩa Mũnene marũgamĩte “hanene.” (Kũguũrĩrio 18:3, 9, 10, 15-17) Kwoguo no tuuge atĩ Babuloni ũrĩa Mũnene ti ũthamaki wa gĩũteti kana wa kĩbiacara, no nĩ wa kĩndini.

Ningĩ gũkũũrana Babuloni ũrĩa Mũnene nĩ gũtaarĩirio makĩria nĩ ũrĩa erĩtwo atĩ ahĩtithagia ndũrĩrĩ ciothe na “mĩthaiga” yake. (Kũguũrĩrio 18:23) Tondũ mĩthemba yothe ya ũgo na ũragũri nĩ ya kĩndini na yumanaga na ndaimono-rĩ, ti ũndũ wa magegania atĩ Bibilia ĩĩtaga Babuloni ũrĩa Mũnene “gĩikaro kĩa ndaimono.” (Kũguũrĩrio 18:2; Gũcokerithia 18:10-12) Ũthamaki ũcio ningĩ wĩrĩkanaga atĩ ũkararagia ndini ya ma hingo ciothe, ũkanyarira “anabii” na “andũ arĩa aamũre.” (Kũguũrĩrio 18:24) Ũrĩa kũrĩ nĩ atĩ Babuloni ũrĩa Mũnene amenete ndini ya ma ũũ atĩ amanyariraga atarĩ na tha, o na akooraga “aira a Jesu.” (Kũguũrĩrio 17:6) Nĩũndũ ũcio-rĩ, mũtumia ũcio wĩtagwo Babuloni ũrĩa Mũnene hatarĩ nganja onanagia ũthamaki wa thĩ yothe wa ndini cia maheni, ciothe iria ikararagia Jehova Ngai.