MU DIVULU dia Dijingunuinu, tu sanga-mu izuelu ki ia tokala ku i tendela kála kidi, maji kála ijimbuete ngó. (Dijingunuinu 1:1) Mu kifika, o divulu didi di tumbula muhatu uala ni dijina “Babilonha ia Dikota” diosoneke bhu dibhômo diê. Di tanga kuila o muhatu iú ua xikama ku thandu dia ‘miji ia athu ni ku ifuxi’. (Dijingunuinu 17:1, 5, 15) Tuejiia kuila ki kuala muhatu u tena ku bhanga kiki, kilombolola kuila Babilonha ia Dikota, ki muhatu mu xitu, maji kijimbuete ngó. Kienhiki-phe, ihi ilombolola o kijimbuete kiki kia kidia-nzunga?

Mu divulu dia Dijingunuinu 17:18, o muhatu iú a mu tanga kála ua xikama mu “mbanza ia dikot’oio ia mu tumina o jisobha mu ngongo.” O kizuelu “mbanza” kilondekesa  kibuka kia athu a bhongoloka. Mukonda dia “mbanza ia dikot’oio” ku tumina “o jisobha mu ngongo,” o muhatu iú a mu ixana Babilonha ia Dikota, u tena ku kala ngó kisangela ki tumina o ngongo ioso. A ixana ué kisangela kia mundu. Kisangela kia ukexilu uahi? Kisangela kia jingeleja. Tu di longe o ibatulu mu divulu dia Dijingunuinu i tu kuatekesa ku banza kiki.

O kisangela ki tena ku kala kia jinguvulu, kia uenji, mba kia jingeleja. O muhatu iú, a mu ixana Babilonha ia Dikota, ki kisangela kia jinguvulu, mukonda o Dízui dia Nzambi diamba kuma “o jisobha joso mu ngongo” ‘a bhanga nê undumbu.’ O undumbu uê, ua difuangana ni ukaza ua bhange ni jinguvulu ja ngongo, kiki kiene ki bhangesa ku mu ixana ‘kidia-nzunga kia dikota’—Dijingunuinu 17:1, 2; Tiiaku 4:4.

O Babilonha ia Dikota ki i tena ku kala kisangela kia uenji, mukonda o ‘jingenji ja ngongo’ a-nda dila jingololo kioso kia-nda mu buika. Amba ué kuila, o jisobha ni jingenji “a kèmana mu kanga” mu tala Babilonha ia Dikota. (Dijingunuinu 18:3, 9, 10, 15-17) Kiki-phe, ki kia iibha ku banza kuila Babilonha ia Dikota ki kisangela kia jinguvulu, mba kia uenji, maji kisangela kia jingeleja.

O kuila Babilonha ia Dikota, kisangela kia jingeleja, tu ki sanga mu izuelu ia kuila muéne ua mu nganala o ifuxi ioso ni “uanga” uê. (Dijingunuinu 18:23) Mukonda dia uanga ku tunda ku madimonho, ki tua tokala ku diuana mukonda dia Bibidia ku ixana Babilonha ia Dikota kála “ditungilu dia madimonho.” (Dijingunuinu 18:2; Matendelelu 18:10-12) Amba ué kuila, o kisangela kiki kizukutisa ué o ubhezelu ua kidi, ni “jipolofeta” ni “akua-Ngana.” (Dijingunuinu 18:24) Mu kidi, o Babilonha ia Dikota iala ni nganji ia ubhezelu ua kidi, katé ué muéne u jibha “o jifiiele jangene ja Jezú” (Dijingunuinu 17:6) Kiki-phe, kilondekesa kuila o muhatu a mu ixana Babilonha ia Dikota, ulondekesa o kisangela kia mundu kia jingeleja ja makutu, jene mu bhânga ni Jihova Nzambi.