ДЬ КʹЬТЕБА Әʹйантида һәнә гьли-готьнед ӧса йед кӧ әм гәрәке рʹастә-рʹаст фәʹм нәкьн, чьмки мәʹна ван гьлийа тьштәки дьн ә. Мәсәлә, дь кʹьтеба Әʹйантида те гьликьрьне дәрһәԛа жьнәке кӧ ль сәр әʹнийа ԝе ньвисар ә «Бабилона Мәзьн». Әв жьн рʹуньштийә ль сәр «әʹлаләт» у мьләта (Әʹйанти 17:1, 5, 15). Ле чьмки бь рʹастийе тʹӧ жьн нькарә ль сәр әʹлаләте рʹуне, ләма жи фәʹмдари йә ԝәки хәбәра «Бабилона Мәзьн» бь симболик гәрәке фәʹм бькьн. Ԝәрә әм пебьһʹәсьн әв жьна ԛав чь те һʹәсабе?

Дь кʹьтеба Әʹйанти 17:18-да ль сәр ве жьна бь симболики ӧса те готьне: «Әԝ жьна кӧ тә дит, әԝ бажаре мәзьн ә, йе  кӧ пʹадшатийе ль сәр пʹадшед дьнйайе дькә». Чьмки «бажаре мәзьн» сәрԝертийа «пʹадшед дьнйайе» дькә, ләма жи әм дькарьн бежьн, кӧ әв жьна бь наве «Бабилона Мәзьн» һәйә тʹәшкиләтәкә мәзьнә һʹәмдьнйайе, йа кӧ ль сәр тʹәмамийа дьнйайе һʹӧкӧм дькә. Ле гәло әв чь тʹәшкиләт ә? Әв һәйә тʹәшкиләта һʹәму религийед ԛәлп. Ԝәрә әм бьньһерʹьн ча рʹезед жь кʹьтеба Әʹйанти, әве йәке избат дькьн.

Тʹәшкиләт дькарә бьбә йа политике (сийасәтийе), йа тʹӧщарәтийе у йа религийайе. Жьн бь наве «Бабилона Мәзьн» нькарә бьбә тʹәшкиләта политике, чьмки дь Хәбәра Хԝәдеда ньвисар ә кӧ «пʹадшед дьнйайе» демәк тʹәшкиләтед политика ве дьнйайе, «тʹәви ве ԛави кьрьн». Ԛавийа ве жьна бь симболик дь ԝе йәкеда нә, кӧ әԝе пәйман гьредайи йә тʹәви сәрԝеред ве дьнйайе у әԝ һʹәму тьшти дькә кӧ ԛәԝате һьлдә у бькарьбә ль сәр ԝан һʹӧкӧм кә. Аһан, ләма жи әԝ те навкьрьне «ԛава бь нав у дәнг» (Әʹйанти 17:1, 2; Аԛуб 4:4).

Бабилона Мәзьн нә жи тʹәшкиләта тʹӧщарәтийе йә, чьмки «базьрганед дьнйайе», йан жи тʹәшкиләтед тʹӧщарәтийе ԝе бьгьрин чахе бьбиньн кӧ әԝ те һьлшандьне. Дь Әʹйантида ӧса жи те гьликьрьне, ԝәки базьрганед у пʹадшед дьнйайе жь Бабилона Мәзьн «ԝе дур бьсәкьньн» (Әʹйанти 18:3, 9, 10, 15-17). Жь вьр те кʹьфше, ԝәки Бабилона Мәзьн тʹәшкиләта политикайе у тʹӧщарәтийе нинә, әв һәйә тʹәшкиләта религийайе.

Диса избаткьрьнәк һәйә кӧ Бабилона Мәзьн, әв һәйә тʹәшкиләта религийайе. Дь Әʹйантида те готьне, кӧ әԝ «бь сербазийа» һʹәму мьләта дьхальфинә (Әʹйанти 18:23). Һʹәму щурʹед сербазийе жь щьна нә, ләма жи әʹщебмайи нинә кӧ Кʹьтеба Пироз ль сәр «Бабилона Мәзьн» дьбежә «щи-ԝар, мьскʹәне щьна» (Әʹйанти 18:2; Ԛануна Дӧщари 18:10-12). Әв тʹәшкиләт ӧса жи мьԛабьли һʹәбандьна рʹаст дәрдькʹәвә, у пәй «пʹехәмбәр у щьмәʹта Хԝәде» дькʹәвә (Әʹйанти 18:24). Бабилона Мәзьн һаԛас зәʹф һʹәбандьна рʹаст нәфрʹәт дькә, кӧ бь зӧлми пәй «шәʹдед Иса» дькʹәвә у һәла ԝана дькӧжә жи (Әʹйанти 17:6). Ча те кʹьфше, жьн бь наве Бабилона Мәзьн, те һʹәсабе тʹәшкиләта һʹәбандьна ԛәлпә һʹәмдьнйайе, демәк һʹәму религийед кӧ мьԛабьли Йаһоԝа Хԝәде дәрдькʹәвьн.