MUBUKU wa Lumwekesho muji byambo byafwainwa kubula kwibyumvwinatu monka mo byanembelwa ne. (Lumwekesho 1:1) Kya kumwenako, watongola mwanamukazhi uji na jizhina ja “Babilona Mukatampe” janembwa pa kilungi kyanji. Uno mwanamukazhi waambiwa’mba waikala pa “mabumba, ne mikoka.” (Lumwekesho 17:1, 5, 15) Na mambo a kuba kafwako mwanamukazhi wafwainwa kuba bibye ne, Babilona Mukatampe wafwainwa kwikala wa kifwanyikizho. Pano nga uno mwanamukazhi wa kifwanyikizho wimenako ka?

Mu Lumwekesho 17:18, uno yenka mwanamukazhi wa kifwanyikizho walondololwa amba “muzhi mukatampe, wikala mu bufumu bwa bamfumu ba panopantanda.” Kyambo kya “muzhi” kilumbulula jibumba ja bantu bakwatankana. Byo kiji kuba’mba  uno “muzhi mukatampe” ye ulama “bamfumu ba panopantanda,” uno mwanamukazhi watongolwa’mba Babilona Mukatampe wafwainwa kwikala ke jibumba jiji bingi na bulume mu byalo byonse. Wakonsha ne kutelwa’mba bufumu bwa ntanda yonse. Bufumu bwa mutundu ka? Bufumu bwa bupopweshi. Akimonai bibaba bimo bya mu buku wa Lumwekesho byo bitulengela kwamba kino.

Bufumu bwakonsha kwikala bwa bumulwila ntanda, bwa busulu, nangwa bwa bupopweshi. Mwanamukazhi wa jizhina ja Babilona Mukatampe kechi bufumu bwa bumulwila ntanda ne, mambo Mambo a Lesa aamba’mba “bamfumu pa panopantanda,” nangwa’mba bantu ba bumulwila ntanda ba panopantanda, ‘baubile nanji bulalelale.’ Buno bulalelale ke lumvwañano lo aumvwañana na bakalama ba panopantanda kabiji kino kilumbulula ene mambo o echilwa’mba “pite mukatampe.”—Lumwekesho 17:1, 2; Yakoba 4:4.

Babilona Mukatampe kuba waikala bufumu bwa bya busulu ne, mambo “bapoteshi ba panopantanda,” kwimenako bantu ba bya busulu, bakamujilanga kimye kyo akonaunwa. Bamfumu ne bapoteshi balondololwa’mba “baimana kwalepa” sa bamutala Babilona Mukatampe. (Lumwekesho 18:3, 9, 10, 15-17) Onkao mambo, kyayilamo kwamba’mba Babilona Mukatampe kechi bufumu bwa bumulwila ntanda nangwa bwa busulu ne, ke bufumu bwa bupopweshi.

Kabiji Babilona Mukatampe wayukanyikwa’mba wa bupopweshi na byambo bikwabo bya kuba’mba ujimbaika mikoka yonse ya bantu na ‘buñanga bwanji bwa lubuko.’ (Lumwekesho 18:23) Na mambo a kuba misango yonse ya buñanga bwa lubuko nangwa’mba kupopwela mipashi ifuma ku bademona, Baibolo kyokyo amutelela Babilona Mukatampe amba “mwakwikala bademona.” (Lumwekesho 18:2; Mpitulukilo ya mu mizhilo 18:10-12) Kabiji buno bufumu bwalondololwa amba bulengulula bingi bupopweshi bwa kine, kumanyika “bangauzhi” ne “bazhijikwa.” (Lumwekesho 18:24) Babilona Mukatampe washikwa bingi bupopweshi bwa kine kya kuba umanyika ne kwipaya “batumonyi ba Yesu” kyatama. (Lumwekesho 17:6) Onkao mambo, uno mwanamukazhi utelwa’mba Babilona Mukatampe wimenako bufumu bwa ntanda yonse bwa bupopweshi bwa bubela, mwavwangwa ne bupopweshi bonse bulengulula Yehoba Lesa.