တၢ်ပိာ်ထွဲ
တၢ်သ့ၣ်ညါနီၤဖး ‘ဘၤဘူၤလိၣ်ဖးဒိၣ်’
လံာ်လီၣ်ဖျါအပူၤ တၢ်ကတိၤလၢ ပဟံးန့ၢ်အခီပညီ လိၤလိၤတသ့န့ၣ် အိၣ်ဝဲအါမးလီၤ. (လီၣ်. ၁:၁) အဒိ, ပာ်ဖျါဝဲ ပိာ်မုၣ်လၢ အကွဲးလီၤ အမံၤလၢအမ့ၢ် ‘ဘၤဘူၤလိၣ်ဖးဒိၣ်’ လၢအခိၣ်တိသၣ်အလိၤ တဂၤအဂ့ၢ်န့ၣ်လီၤ. ပာ်ဖျါဝဲလၢ ပိာ်မုၣ်အံၤ ဆ့ၣ်နီၤလၢ “ပှၤကလုာ်ကလုာ် ဒီးပှၤကတိၤတၢ် အကျိာ်တဖၣ်” အဖီခိၣ်လီၤ. (လီၣ်. ၁၇:၁, ၅, ၁၅) ပိာ်မုၣ်နီၢ်ကီၢ်တဂၤန့ၣ် ဆ့ၣ်နီၤဒ်သိးန့ၣ် တသ့ဘၣ်အဃိ ဘၤဘူၤလိၣ်ဖးဒိၣ်န့ၣ် ကမ့ၢ်ဒၣ် တၢ်ဒိလီၤန့ၣ်လီၤ. မ့မ့ၢ်ဒ်န့ၣ်ဒီး အဝဲခၢၣ်စးဝဲ တၢ်မနုၤလဲၣ်.
လီၣ်ဖျါ ၁၇:၁၈ ပာ်ဖျါဝဲလၢ ပိာ်မုၣ်ဒိလီၤအံၤန့ၣ် “မ့ၢ်ဝ့ၢ်ဖးဒိၣ်လၢ အပၢဘၣ် ဟီၣ်ခိၣ်အစီၤပၤတဖၣ်လီၤ.” တၢ်ကတိၤလၢအမ့ၢ် “ဝ့ၢ်ဖးဒိၣ်” န့ၣ်ယၢၤဖျါထီၣ်ဝဲ ပှၤကညီ အတၢ်ကရၢကရိ တခါလီၤ. “ဝ့ၢ်ဖးဒိၣ်” အံၤပၢဝဲဟီၣ်ခိၣ် စီၤပၤတဖၣ်အဃိ ပိာ်မုၣ်လၢအမံၤမ့ၢ် ဘၤဘူၤလိၣ်ဖးဒိၣ်အံၤန့ၣ် ကဘၣ်မ့ၢ်ဝဲ တၢ်ကရၢကရိတခါလၢ အစိကမီၤဒိၣ်ဘၢ ထံကီၢ်ကိးဘ့ၣ်ဒဲး ဃၣ်ဃၣ်န့ၣ်လီၤ. တၢ်အံၤ ပကိးအီၤလၢ ဟီၣ်ခိၣ်အ့ၣ်ပၣ်ယၣ်န့ၣ် ကြၢးဝဲဘၣ်ဝဲလီၤ. မ့ၢ်အ့ၣ်ပၣ်ယၣ် မနုၤလဲၣ်. တၢ်ဘူၣ်တၢ်ဘါ အ့ၣ်ပၣ်ယၣ်လီၤ. ပာ်သူၣ်ပာ်သးလၢ တၢ်စံၣ်ညီၣ်တဲာ်ဒ်အံၤအဂီၢ် လံာ်လီၣ်ဖျါအပူၤ ဘၣ်ဃးဒီး လံာ်စီဆှံအဆၢတနီၤန့ၣ်တက့ၢ်.
အ့ၣ်ပၣ်ယၣ်န့ၣ် မ့ၢ်ဝဲထံဂ့ၢ်ကီၢ်ဂ့ၢ်, တၢ်ပနံာ်တၢ်ကၤ, မ့တမ့ၢ် တၢ်ဘူၣ်တၢ်ဘါသ့လီၤ. ပိာ်မုၣ်လၢအမံၤမ့ၢ် ဘၤဘူၤလိၣ်ဖးဒိၣ်န့ၣ် တမ့ၢ်ထံဂ့ၢ်ကီၢ်ဂ့ၢ် အ့ၣ်ပၣ်ယၣ်ဘၣ်, မ့ၢ်လၢ ယွၤအကလုၢ်ကထါ ပာ်ဖျါဝဲလၢ “ဟီၣ်ခိၣ်အစီၤပၤတဖၣ်” မ့တမ့ၢ် ထံဂ့ၢ်ကီၢ်ဂ့ၢ် အတၢ်ကရၢကရိတဖၣ်န့ၣ် “မၤကမၣ်မုၣ်ကမၣ်ခွါ” ဒီးအီၤအဃိလီၤ. တၢ်မၤကမၣ်မုၣ် ကမၣ်ခွါအံၤန့ၣ် ယၢၤဖျါထီၣ်ဝဲလၢ အဝဲမၤတၢ်ဒီတံၤဒီသကိးဒီး ဟီၣ်ခိၣ်စီၤပၤတဖၣ် ဒီးတဲနၢ်ပၢၢ်ဝဲလၢ ဘၣ်မနုၤအဃိ ပှၤကိးအီၤလၢ “ဃဲသဲမုၣ်ဖးဒိၣ်” လဲၣ်န့ၣ်လီၤ.—လီၣ်. ၁၇:၁, ၂; ယၤကိာ် ၄:၄.
ဘၤဘူၤလိၣ်ဖးဒိၣ်န့ၣ် တမ့ၢ်စ့ၢ်ကီး တၢ်ပနံာ်တၢ်ကၤ အ့ၣ်ပၣ်ယၣ်ဘၣ်, မ့ၢ်လၢ “ပှၤကၤတၢ်ဖိတဖၣ်” လၢအခၢၣ်စး တၢ်ပနံာ်တၢ်ကၤ ကရၢကရိန့ၣ် ဟီၣ်ဝဲဖဲအဝဲဟးဂီၤ အကတီၢ်န့ၣ်လီၤ. နီၢ်နီၢ်န့ၣ်, ပာ်ဖျါဝဲလၢ စီၤပၤတဖၣ် ဒီးပှၤကၤတၢ်ဖိတဖၣ်န့ၣ် ဆၢထၢၣ်ကွၢ်ဝဲ ဘၤဘူၤလိၣ်ဖးဒိၣ်လၢ “အယံၤ” လီၤ. (လီၣ်. ၁၈:၃, ၉, ၁၀, ၁၅-၁၇) လၢတၢ်န့ၣ်အဃိ, ပမ့ၢ်စံၣ်ညီၣ်တဲာ်လၢ ဘၤဘူၤလိၣ်ဖးဒိၣ်န့ၣ် တမ့ၢ်ထံဂ့ၢ်ကီၢ်ဂ့ၢ် အ့ၣ်ပၣ်ယၣ် အသိး တမ့ၢ်စ့ၢ်ကီး တၢ်ပနံာ်တၢ်ကၤ အ့ၣ်ပၣ်ယၣ်ဘၣ်ဒီး မ့ၢ်ဒၣ် တၢ်ဘူၣ်တၢ်ဘါ အ့ၣ်ပၣ်ယၣ်န့ၣ် ကြၢးဝဲဘၣ်ဝဲလီၤ.
တၢ်ပာ်ဖျါထီၣ်လၢ ခီဖျိအဝဲ “အတၢ်မၤကဒါပမဲာ် ကဘျံးကဘျၣ်” အဃိလီန့ၢ် ပှၤကိးကလုာ်ဒဲးန့ၣ် မၤဂၢၢ်ကျၢၤအါထီၣ်ဝဲလၢ ဘၤဘူၤလိၣ်ဖးဒိၣ်မ့ၢ် တၢ်ဘူၣ်တၢ်ဘါန့ၣ်လီၤ. (လီၣ် ၁၈:၂၃) ကယဲၢ်တၢ်ဟိၣ်တၢ်ယီ အတၢ်သ့တၢ်ဘၣ်ခဲလၢာ်န့ၣ် ဘၣ်ထွဲလိာ်သးဒီး တၢ်ဘူၣ်တၢ်ဘါဒီး ဟဲလီၤစၢၤလၢ တၢ်နါတဖၣ်အဃိ လံာ်စီဆှံကိးဝဲ ဘၤဘူၤလိၣ်ဖးဒိၣ်လၢ “တၢ်ဝံတၢ်နါအလီၢ်” န့ၣ်တလီၤကမၢကမၣ်ဘၣ်. (လီၣ်. ၁၈:၂; ၅ မိၤၡ့ ၁၈:၁၀-၁၂) ပာ်ဖျါဝဲလၢ အ့ၣ်ပၣ်ယၣ်အံၤန့ၣ် ထီဒါဝဲ တၢ်ဘူၣ်တၢ်ဘါ အမ့ၢ်အတီ ဆူၣ်ဆူၣ်ဒီး မၤနးမၤဖှီၣ်ဝဲ “ဝံတဖၣ်” ဒီး “ပှၤစီဆှံတဖၣ်” စ့ၢ်ကီးလီၤ. (လီၣ်. ၁၈:၂၄) နီၢ်နီၢ်န့ၣ်, ဘၤဘူၤလိၣ်ဖးဒိၣ်န့ၣ် သးဟ့ဝဲ တၢ်ဘူၣ်တၢ်ဘါ အမ့ၢ်အတီနးနးကလဲာ် ဒီးမၤဆူၣ်မၤစိး မၤနးမၤဖှီၣ် “ပှၤလၢအအုၣ်အသးလၢ ယ့ၣ်ၡူးအဂ့ၢ်အကျိၤတဖၣ်” တကးဘၣ်အမဲာ်ညါ တုၤဒၣ်လဲာ်လၢ မၤသံဝဲဒၣ်န့ၣ်လီၤ. (လီၣ်. ၁၇:၆) လၢတၢ်န့ၣ်အဃိ ပိာ်မုၣ်လၢအမံၤမ့ၢ် ဘၤဘူၤလိၣ်ဖးဒိၣ်အံၤန့ၣ် ဖျါတြၢၤကလာ်လၢ ခၢၣ်စးဝဲ ဟီၣ်ခိၣ်တၢ်ဘူၣ်တၢ်ဘါကမၣ် အ့ၣ်ပၣ်ယၣ်လၢ ပာ်ဃုာ်ဒီး တၢ်ဘူၣ်တၢ်ဘါလၢ အထီဒါ ယဟိဝၤ ကစၢ်ယွၤခဲလၢာ်န့ၣ်လီၤ.
