BUKE zEhororo kwa kara noyifanekeso yoyinzi. Pasihonena, azo kutumbura mukadi ogu va tjanga posipara sendi edina “Babironi zonene.” Mukadi ogu kumutanta asi age kuna hingire ‘ponomuhoko donombunga dovantu.’ (Ehororo 17:1, 5, 15) Moomu tupu kwato mukadi gopanyama ngano nga vhura kuyirugana eyi, Babironi zonene za hepa kufanekesa yuma. Yinke azi fanekesa hondedi ezi?

MEhororo 17:18, mukadi googu gosifanekeso kuna kumutumbura asi “sitata sosinene esi asi pangere ohompa navenye womouzuni.” Nkango “sitata” kulikida kombunga zovantu  zokulipakerera. Mokumona asi “sitata sosinene” kupangera “ohompa navenye womouzuni,” mukadi gedina Babironi zonene ga hepa nye kukara mbunga zononkondo zomouzuni naunye. Azo kuvhura kuzitumbura nawa-nawa asi epangero lyomouzuni. Epangero musinke? Lyoukereli. Koneka omu nonkango dimwe domobuke zEhororo adi twaredesa kehuliso eli.

Epangero kuvhura kukara lyoupolitika ndi lyounangesefa ndi lyoukereli. Mukadi gedina Babironi zonene kapisi epangero lyoupolitika morwa Nonkango daKarunga kutanta asi “ohompa navenye womouzuni,” ndi vanapolitika, “ngava hondere” nendi. Ehondero lyendi kulikida komalikwatakano aga ga tura po kumwe novapangeli vepevhu ntani yipo nye ava mu tumbwire asi “hondedi zonene.”—Ehororo 17:1, 2; Jakopo 4:4.

Babironi zonene kapi tazi vhuru kukara epangero lyounangesefa morwa “varandesi,” kukarera po unangesefa womouzuni naunye, ngava mu lira posiruwo sezonauko lyendi. Mousili, ohompa novarandesi kuna kuvasingonona asi awo “ngava sikama koure” va tare Babironi zonene. (Ehororo 18:3, 9, 10, 15-17) Yipo nye, ya wapa mokuhulisa asi Babironi zonene, kapisi epangero lyoupolitika ndi lyounangesefa, nye lyoukereli.

Mokudimburura Babironi zonene asi azo ukereli, egano eli simpe kuyikwatesa ko pokutanta asi age kupukisa nomuhoko nadinye kupitira ‘moumpure.’ (Ehororo 18:23) Moomu tupu marupe nagenye goumpure kwa likwatakana noukereli ntani kwa tundilira konompempo donondona, kapi ayi tetukisa asi Bibeli kutumbura Babironi zonene asi “uhingiro wonompepo donondona.” (Ehororo 18:2; Deuteronomium 18:10-12) Epangero eli hena kulisingonona asi kuna litura mo mokuhomokera ukereli wousili, nokuhepeka ‘vaporofete’ ntani ‘novapongoki.’ (Ehororo 18:24) Mousili, Babironi zonene kwa kara nonyengo zonene koukereli wousili yipo a hepeke nonyanya ntani nokudipaga ‘nondipo daJesus.’ (Ehororo 17:6) Mukadi ogu gedina Babironi zonene nawa-nawa kwa karera po ukerelikarunga woyimpempa womouzuni naunye, ou wa kwatera mo maukereli nagenye aga aga rwanesa Jehova Karunga.