MUNA nkanda Lusengomono muna ye mvovo ke mifwete bakulwa una miasonamena ko. (Lusengomono 1:1) Muna bong’e nona, o nkanda wau uyikanga nkento mosi wasonama nkumbu ya “Babele Anene” vana luse lwandi. Usonganga mpe vo nkento ndioyo ovwende vana “nkangu ye ndonga.” (Lusengomono 17:1, 5, 15) Wau vo ke vena muntu ko olenda vwanda vana nkangu ye ndonga, Babele Anene ke nkento wa kinitu ko. Ozevo, nkento a ndumba ndioyo nani kesunzulanga?

Muna Lusengomono 17:18, tutanganga vo nkento ndioyo “i mbanz’anene, ina ikalanga ye kintinu kia ntinu mia nza.” E mvovo wau “mbanza” nkubika yovo buka kia wantu  uyikanga. Wau vo e “ntinu mia nza,” mu “mbanz’anene” bekalanga, o nkento oyikwanga vo Babele Anene i nkubika ina ye wisa mu nz’amvimba. I kintwadi kia nz’amvimba. Nkia kintwadi kiaki? Kintwadi kia mabundu. Tala sono yakaka muna nkanda Lusengomono yitusadisi mu zaya diambu diadi.

E kintwadi kilenda kala kia ayadi a nza, kia kinkita yovo kia mabundu. E Babele Anene ke kintwadi kia ayadi a nza ko, kadi Nkand’a Nzambi uvovanga vo “ntinu mia nza,” yovo ayadi a nza, ‘batele e zumba’ yo nkento ndioyo. E zumba kiaki i ngwizani kekalanga yau ye ntinu mia nza, ikuma keyikilwanga mpe vo “nkembi anene.”—Lusengomono 17:1, 2; Yakobo 4:4.

Babele Anene ke kintwadi kia akiti a nz’amvimba ko, ekuma kadi “akiti a nza” dila bekundila vava kefwaswa. Ntinu mia nza y’akiti betelama “kuna vala” mu tala Babele Anene muna lufwasu lwandi. (Lusengomono 18:3, 9, 10, 15-17) Muna kuma kiaki, diafwana mu vova vo Babele Anene, ke kintwadi kia ayadi a nza ko ngatu vo kintwadi kia akiti a nz’amvimba, kansi i kintwadi kia nsambila zawonso za luvunu ova nza.

E diambu diakaka disonganga vo Babele Anene i kintwadi kia nsambila yovo mabundu i mpila mebendomwenanga e zula yawonso muna mavangu mau ma ‘mpandu.’ (Lusengomono 18:23) Wau vo mpandu zawonso mu mabundu ye kwa nkuya zitukanga, ke lukatikisu ko vo Babele Anene kayikilwanga mpe vo “kalu kia nkwiya.” (Lusengomono 18:2; Nsiku 18:10-12) E kintwadi kia nsambila zawonso za luvunu ova nza kisianga mpe nsambila aludi kitantu yo bangika “a ngunza y’aveledi.” (Lusengomono 18:24) Dialudi, Babele Anene yibangikanga yo vonda “mbangi za Yesu.” (Lusengomono 17:6) Muna kuma kiaki, nkento ndioyo, Babele Anene, kintwadi kia nsambila zawonso za luvunu ova nza kesunzulanga. I sia vo nsambila zawonso zisianga Yave wa Nzambi e kitantu.