MUKANDA wa Kusokwelwa udi na bishima bivule kebifwaninwepo kwimvwana pa bute pa bute. (Kusokwelwa 1:1) Kimfwa utela mwana-mukaji udi na dijina dya bu “Babiloni Mukatampe” disonekwe pa mpala yandi. Uno mwana-mukaji unenwa amba ushikete pa “bibumbo ne mizo.” (Kusokwelwa 17:1, 5, 15) Bine, Babiloni Mukatampe i wa kyelekejo, mwanda i kutupu mwana-mukaji ubwanya kulonga kino. Shi ke pano, uno wabwitwa wa kyelekejo welekeja bika?

Mu Kusokwelwa 17:18, uno mwana-mukaji umo yenka wa kyelekejo utelwa bu “kibundi kikatampe kibikele pa balopwe ba pano pa ntanda.” Kishima “kibundi” kilombola amba i  kitango kya bantu kilongololwe. Ino kino “kibundi kikatampe” byokibikele pa “balopwe ba pano pa ntanda,” nanshi uno mwana-mukaji utelwa bu Babiloni Mukatampe ufwaninwe kwikala bulongolodi budi na lupusa ntanda yonso. O mwanda witwa mobyendele bu umbikalo wa ntanda. Le i umbikalo’ka? I wa bipwilo. Tala mavese amoamo a mu mukanda wa Kusokwelwa moetufikijija ku kunena uno muswelo.

Umbikalo ukokeja kwikala wa politike, wa busunga nansha wa bipwilo. Ino mwana-mukaji utelwa dya bu Babiloni Mukatampe ke umbikalopo wa politike mwanda Kinenwa kya Leza kinena’mba “balopwe ba pano pa ntanda,” bantu ba politike, balālanga nandi busekese. I mulonge buno busekese na kusamba bipwano na baludiki ba ino ntanda mwafwila kwikala na bukomo ne na lupusa pobadi. O mwanda utelwa bu “ndumba mukatampe.”—Kusokwelwa 17:1, 2; Yakoba 4:4.

Kadi Babiloni Mukatakata ke umbikalopo wa busunga mwanda “bansunga ba pano pa ntanda,” belekeja bantu bemanine bya busunga, bakadila miyoa kitatyi kyakonakanibwa. Bine, ne balopwe ne bansunga bonso batelwa amba bakemana “kulampe” ke batale Babiloni Mukatampe. (Kusokwelwa 18:3, 9, 10, 15-17) O mwanda i kyendele’mo tunene amba Babiloni Mukatampe ke umbikalopo wa politike nansha wa busunga, ino i umbikalo wa bipwilo.

Kuyukana kuyukene Babiloni Mukatampe bu bipwilo i kubingijibwe na bino binenwa bikwabo binena amba ongolanga mizo na “bya majende” byandi. (Kusokwelwa 18:23) Miswelo yonso ya majende byoilupukanga ku bipwilo ne ku bandemona, nanshi ke kya kutulumukapo shi Bible utela Babiloni Mukatampe bu “kīkalo kya bandemona.” (Kusokwelwa 18:2; Kupituluka 18:10-12) Uno umbikalo kadi i mulombolwe amba ulwanga na kipwilo kya bine, na kupangapanga “bapolofeto” ne “bajila.” (Kusokwelwa 18:24) Bine, Babiloni Mukatakata ushikilwe ne pa mfulo kipwilo kya bine, o mwanda upangapanga byamalwa ne kwipaya “batumoni ba Yesu.” (Kusokwelwa 17:6) Nanshi uno mwana-mukaji utelwa dya bu Babiloni Mukatampe welekeja patōkelela umbikalo wa bipwilo bya bubela, kubadila’mo ne bipwilo byonso bya lwana na Yehova Leza.