Mwakwijivila “Mbavilone Wamunene”

MUKANDA waKusoloka watwama namazu aze kaveshi kuhasa kwivwishisa vatu nge navejiva kuwalumbununa kaha kweseka namuze vawasonekelako. (Kusoloka 1:1) Chakutalilaho, mukanda kana wavuluka pwevo akwechi lijina vasoneka haluholo lwenyi ngwavo, “Mbavilone Wamunene.” Ou pwevo vamuvuluka ngwavo atwama ‘hamayongomena nahali vaka-mafuchi.’ (Kusoloka 17:1, 5, 15) Hakuwana nge kakweshi pwevo mwahasa kulinga ngochoko, shikaho, ou Mbavilone Wamunene atela kupwa wachifwanyisa. Uno ou pwevo muka-ujila wachifwanyisa emanyinako ika?

Hali Kusoloka 17:18, ou vene pwevo wachifwanyisa vamuvuluka ngwavo “nganda yayinene yize yili nawangana wavamyangana  vahamavu.” Lizu “nganda” lyalumbununa lizavu lyavatu vali hamwe. Hakuwana nge eyi “nganda yayinene” yili nangolo hali “vamyangana vahamavu,” ngocho pwevo vavuluka ngwavo Mbavilone Wamunene atela kupwa hiliuka lyangolo chikuma lyamukaye kosena. Liuka kaneli tunahase kulivuluka ngwetu hiwangana wamukaye kosena. Uno ou wangana kana wapwa wamuyachi muka? Hiwangana wamukwitava. Achitale omu mijimbu yimwe yamumukanda waKusoloka yasolola chuma kanechi.

Wangana unahase kupwa waupolitiki, chipwe wamukusekasana, chipwe wamukwitava. Pwevo vavuluka ngwavo Mbavilone Wamunene kapwa wangana waupolitikiko, mwomwo Mazu aKalunga amba ngwawo “vamyangana vahamavu,” chipwe ngwetu vaka-mapolitiki vahano hamavu, ‘valingile nenyi ujila.’ Ujila wenyi wapwa vivwasano vize eji kulinganga navaka-kuyula vahano hamavu nakusolola jino ovyo vamuvulukila ngwavo “muka-ujila wauvulu.”—Kusoloka 17:1, 2; WaYakova 4:4.

Mbavilone Wamunene keshi kuhasa kupwa wangana wamukusekasanako, mwomwo “vaka-kusekasana vahamavu,” vaze vemanyinako vyuma vyamukusekasana, navakalishona omu navakamwenyeka. Vamyangana navaka-kusekasana vavavuluka ngwavo navakemana “kwakusuku” nakutala Mbavilone Wamunene. (Kusoloka 18:3, 9, 10, 15-17) Shikaho, chapwa chakutamo kukukulula ngwetu Mbavilone Wamunene apwa wangana wamukwitava, keshi wangana waupolitiki chipwe wamukusekasanako.

Mazu akwamba ngwavo Mbavilone Wamunene mwakahungumwisanga vaka-mafuchi osena natufuta twenyi ‘twakupanda,’ asolola nge apwa hiliuka lyamukwitava. (Kusoloka 18:23) Mbimbiliya yavuluka Mbavilone Wamunene ngwayo apwa “muutwamo wavandemone” mwomwo kupanda chosena chafuma kuli vandemone. (Kusoloka 18:2; Lushimbi lwamuchivali 18:10-12) Wangana kanou vauvuluka nawa ngwavo weji kwimanyinanga nakole kwitava chamuchano, nakuyanjisa ‘vapolofweto navaka-kujila.’ (Kusoloka 18:24) Enga, Mbavilone Wamunene ahunga chikuma kwitava chamuchano, ngocho eji kuyanjisanga ‘vinjiho jaYesu’ nakuvajiha. (Kusoloka 17:6) Shikaho, ou pwevo vavuluka ngwavo Mbavilone Wamunene emanyinako chikupu wangana wakwitava chamakuli, muze mwatwama kwitava chosena chize cheji kufumbukilanga Yehova Kalunga.