THU PUAN bu-ah hian angial angana pawm loh tûr chi ṭawngkam a awm nual a. (Thu Puan 1:1) Entîr nân, a chala “Babulon Khaw Ropui” tih inziak hmeichhe chungchâng a sawi a ni. Chu hmeichhia chu “mipui te, hnam te” chunga ṭhu anga sawi a ni a. (Thu Puan 17:1, 5, 15) Hmeichhia tak tak chuan chutianga a tih theih dâwn loh avângin, Babulon Khaw Ropui chu entîr nei a ni ngei ang. A nih chuan, he entîr nei nawhchizuar hian tunge a entîr?

Thu Puan 17:18-ah chuan chu entir nei hmeichhia bawk chu “khaw ropui, leia lalte chunga rorêltu” anga sawi a ni bawk a. ‘Khua’ tih thu mal chuan mipui awmkhâwm a nihzia a târ lang a ni. He “khaw ropui” hian “leia lalte” a thunun tlat avângin, Babulon Khaw Ropui hmingpu hmeichhia chu khawvêl puma thuneihna neitu pâwl thiltithei tak sawina a ni ngei ang. Chu pâwl chu politics lam emaw, sumdâwnna lam emaw ni lovin, sakhaw lam pâwl a ni. Thu Puan bua a kaihhnawih Bible châng ṭhenkhatin chutianga thu tâwp min siamtîr theih chhan lo enfiah ta ila.

Babulon Khaw Ropui tih hmingpu hmeichhia chu politics pâwl a nih theih loh chhan chu Pathian Thuin “leia lalte,” a nih loh leh he khawvêl politics chuan “ani chu an ngai ṭhîn” a tih vâng a ni. A inngaihna tih chuan he khawvêl lalte nêna inzawmna a siam chu a kâwk a, “nawhchizuar ropui tak” tia koh a nih chhan pawh a hrilhfiah bawk a ni.—Thu Puan 17:1, 2; Jakoba 4:4.

Babulon Khaw Ropui chu sumdâwnna pâwl a nih theih loh chhan chu, “leia sumdâwngtute” chuan tihchhiata a awm huna an sûn dâwn vâng a ni. Dik takin, lalte leh sumdâwngtute chuan Babulon Khaw Ropui chu “hla taka ding a,” thlir anga sawi an ni. (Thu Puan 18:3, 9, 10, 15-17) Chuvângin, Babulon Khaw Ropui chu politics lam emaw, sumdâwnna lam emaw ni lovin, sakhaw pâwl a ni tia thu tâwp siam chu a âwm hle.

Babulon Khaw Ropui chu sakhaw lam thil a nihzia a lan chianna dang leh chu, a ‘dâwt sawi’ hmanga hnam zawng zawngte a bumna hi a ni. (Thu Puan 18:23) Atîra ziak Grik  ṭawngah chuan, he thu mal hian “dawithiamna” a kâwk a ni. Dawithiamna zawng zawng hi sakhaw thil leh ramhuaite awmtîr a nih avângin, Bible-in Babulon Khaw Ropui chu “ramhuaite awmna” tia a ko pawh hi a mak lo ve. (Thu Puan 18:2; Deuteronomy 18:10-12) Chu pâwl chu sakhaw dik dodâl tlat leh “zawlneihote” leh “mi thianghlimhote” tiduhdah nia sawi a ni bawk. (Thu Puan 18:24) Dik takin, Babulon Khaw Ropui chuan sakhaw dik chu a huat êm avângin, sakhaw dik betute chu nasa takin a tiduhdah a, “Isua martarho” chu a kut tuara thi an ni. (Thu Puan 17:6) Chuvângin, Babulon Khaw Ropui tih hming pu he hmeichhia hian Pathian Jehova dotu khawvêl puma sakhua zawng zawng a entîr tih a chiang hle.